- Babək Ağayev
eqoloji futurizm
sırf artistlikçün saqqalı saçı buraxacam
ən ağır kitabları deyək ki Coysu orijinaldan oxuyacam
baxacağım ən zəif film kult filmlər siyahısının ilk üçlüyündən olacaq
sonra rəngli-rəngli qalstuklar taxıb-taxıb eynəyimin çərçivələrini dəyişəcəm tez-tez
art house/ underground/ aqnostika/ mistika – dərvişizm hamısı məndən soruşulacaq
sonra bilirsiz nə olacaq?! dənizə barmaqlarımın arasında tüstüləyən siqaretimlə elə kədərli baxacam ki qağayılar havada öləcək
qadınlardan imtina edəcəm/ tək gəzib dolaşacam/ evlənməyəcəm
sırf acığa çox erkən və tənha öləcəm
ölümüm hər mənada öz əlimdən olacaq/
damarlarımı kəsərəm böyük ehtimalla
əfsanəyə çevriləcəm/ haqqımda uydurulacaq/ adıma olan mükafatlar mərasimlərdə gənc şairlərə ilk addımları/ yaxşı şeirləriçün veriləcək
köhnə-kürüş/ cırıq-cındır geyəcəm/ ucuz kafelərdə pulsuz yeyəcəm
kurtka və şalvarlarımda yamaqlar olacaq/ ayaqqabılarım su buraxacaq
həftənin iki günün susub/ üç günün ac/ bir günün susuz keçirəcəm
hər şeyə çatacam/ dırnaqlarım uzanacaq/ iy verəcəm
çimməyəcəm demək olar/ əynimdə müxtəlif heyvanlar gəzişəcək/ yaşayacaq
evim də olmayacaq/ hamının içində olacam/ heç kəs məni tapa bilməyəcək
qadınlar tərəfindən dəfələrlə qarşılıqsız seviləcəm
mənə zibil kimi məktublar gələcək/
çoxu çatmayacaq ünvanım olmayacağından
işləməyəcəm/ qəpiyim də olmayacaq
ayrı-ayrı/ yüngül-ağır xəstəliklər yaxamı buraxmayacaq
heç bir hökumətə müalicəyçün müraciət etməyəcək/
öskürəkdən gəbərsəm də siqareti atmayacam
birinin nə istədiyin gözlərinə bir baxışdan anlayacam
xəyali yağışlar yağacaq
heç olmayan bir kimsənin saçlarını oxşayacam/ oxşayacam
ancaq gecələr yazacam
skamyalardan it kimi qovulacam polislər tərəfindən
tərəfimdən ağılar/ melanxoliyalar/ hüznlər/ rekviyemlər yazılacaq
adamlar onları oxuyub ya dəli kimi sevişəcək gecələri/ ya da özlərin asacaq
yollara düşəcəm/ daşlanacam/ qəbul olunmayacam/ söyüləcəm/ üzümə tüpürüləcək
ağzımdan tutmuş anama/ var yoxumadək döşəsələr də üzlərinə güləcəm
çox içəcəm/ ucuz kirayə daxmalarda kitablar/ butulkalar/ pivə və konserv bankalarıyla yaşayacam
gecələri gözlərimi tavana dirəməkçün uzandığım divanda siqaret kötüklərinin açdığı deşiklərdən cücülər fışqıracaq
dinə inanmayacam/ inananlar məni çarmıxa çəkib/ süngüyə keçirəcək/ tonqalda yandıracaq/ oba-oba gəzdirəcək xalqa görk olsun deyə
rəsmlərə baxıb/ musiqiləri dinləyib elə şərhlər verəcəm ki/
rəssamlar/ bəstəkarlar utanacaq
şəhərlər dağılacaq/ quruyacaq çaylar/ sular
ərşdə kürsüm çoxdan hazır olacaq
dünya bəndənizin dühasından qurtula bilməyəcək
son olaraq istəməsəm də siyasətlərə qarışacam/
idarəetmə mexanizmlərinə qarşı olacam/ pişiklərlə danışa biləcəm
bütün bunlar heç nədən ötrü/ sırf və yalnız və yalnız artistlikçün
