İsa Qəmbər: «Faciədə ölənlərin qatili hakimiyyətdir»
«Bu gün İlham Əliyev Azərbaycandakı siyasi məhbusların, həbsdə olan jurnalist, vətəndaş cəmiyyəti nümayəndələrinin sayına görə liderlik əldə edib». Bunu Müsavat Partiyasının keçmiş lideri İsa Qəmbər Novxanıda mitinqdə çıxışında deyib.
O, Müsavatın Azərbaycan Xalq Cümhuriyyətinin qurulmasının 97-ci ildönümü ilə əlaqədar mayın 28-də Novxanıda Məhəmməd Əmin Rəsulzadənin abidəsi önündə keçirdiyi tədbirdə çıxış edib.
Bildirib ki, 28 May Azərbaycan xalqı üçün ən şərəfli günlərdən biridir və artıq bütün dünyada keçirilən tədbirlərdə cümhuriyyətin qurucusunun məhz Məhmməd Əmin Rəsulzadə olduğu xüsusi vurğulanır.
İsa Qəmbər çıxışında ölkədə baş verən son olaylara, xüsusən də Binəqədi rayonunda 15 nəfərin ölümü ilə nəticələnən yanğına da münasibət bildirib:
«Hakimiyyətin acgözlüyü körpələrimizin ölümünə səbəb olur. Mayın 19-da baş verən faciədə ölənlərin qatili hakimiyyətdir, onların səhlənkarlığı, acgözlüyüdür. Xalqın təhlükəsizliyinə, azadlığına ən böyük təhdid hakimiyyətdir».
Arif Hacılı: «İlk dəfə olaraq əfv sərəncamı imzalanmadı»
Müsavat Partiyasının başqanı Arif Hacılı Cümhuriyyət Gününün ölkədə layiqincə qeyd olunmamasından danışıb:
«Hakimiyyət Məhəmməd Əmin Rəsulzadəyə, onun yaratdığı partiyaya, xalq cümhuriyyətinə, bu şərəfli tarixə qısqanclıqla yanaşır. Bu gün burada olmağa, söz deməyə layiqli olan insanlar həbsxanadadırlar. Onlar Azərbaycan üçün mücadilə apardıqlarına görə həbsxanada əziyyət çəkirlər».
Arif Hacılı çıxışında bu il 28 May münasibətilə əfv sərəncamının imzalanmamasına da diqqət çəkib:
«Azərbaycanın son illər tarixində ilk dəfə bu il istiqlaliyyət bayramı ilə əlaqədar əfv sərəncamı imzalanmadı. Bu da Azərbaycan cəmiyyətinə bir növ meydan oxumaqdır, Azərbaycan müxalifəti ilə hesablaşmamaqdır, say-seçmə vətəndaşları həbsxanada saxlamaqdır, istiqlaliyyətə hörmətsizlikdir».
Arif Hacılı deyir ki, bəzi üzvlərin Müsavatdan kənarlaşdırılması, bəzilərinin isə könüllü istefasına baxmayaraq, partiya öz gücünü qoruyub saxlayıb və noyabr ayında tam gücü ilə parlament seçkilərinə gedəcək.
Cəmil Həsənli: «Bu milləti yaşatmaq bugünkü gəncliyin borcudur»
Azərbaycan Xalq Cümhuriyyətinin qurulmasının 97-ci ildönümü ilə əlaqədar Demokratik Qüvvələrin Milli Şurası da Novxanıda Məhəmməd Əmin Rəsulzadənin abidəsini ziyarət edib.
Şuranın sədri Cəmil Həsənli Azərbaycan Xalq Cümhuriyyətinin yaranma tarixindən, yaradıcılarından danışıb:
«Cümhuriyyəti yaradanlar təkcə mallarını yox, canlarını da millət yolunda fəda ediblər. Biz Rəsulzadə haqqında ilk həqiqətləri Əbülfəz Elçibəydən eşitmişik. O, sovet qadağalarına baxmayaraq, Rəsulzadənin gördüyü işlər barədə gizli otaqlarda yox, auditoriyalarda çıxışlar edirdi. O, həmin dövrün gənclərində dövlətçilik, cümhuriyyətçilik formalaşdırıb. 20 ildən artıqdır torpaqlarımız işğal altındadır. 20 ildir ki, bu qədər sərvətə, imkanlara baxmayaraq, Şuşa üçrəngli bayrağa həsrətdir. Amma cümhuriyyətçi babalarımız çox kiçik imkanlarla bunlara nail olmuşdu».
«Cümhuriyyətçilər dağınıq toplumdan millət yatardılar. Bu milləti yaşatmaq bugünkü gəncliyin borcudur».
Əli Kərimli: «Acgöz hakimiyyət Rəsulzadə təvazökarlığını necə anlaya bilər?»
AXCP lideri Əli Kərimli çıxışında cümhuriyyət qurucularına lazımi dəyərin verilməməsindən danışıb:
«Qurucu babalarımız çox haqsızlığa məruz qalıb, onları yaddaşlardan silmək istəyiblər. Bu gün də onlara qarşı ögey və qısqanc münasibət davam edir. Onların haqqı dövlət səviyyəsində tanınmır. Bu bizi incidir.
Amma burada təəccüblü heç nə yoxdur. Hazırki acgöz hakimiyyət Rəsulzadə təvazökarlığını necə anlaya bilər? Monarxiya qurmaq istəyənlər 1918-ci ildə dünyanın yalnız 25 millətinin cümhuriyyət qurduğu zamanda milləti həmin 25-lərin arasına gətirmiş insanları, bunu 97 il öncə etmiş dahiləri insanları necə anlaya bilər?
Bu qədər müddət ərzində Azərbaycanda cümhuriyyət ideyaları hələ də diri qalır. Çünki bu, təkcə şanlı tariximiz deyil, həm də getdiyimiz yol, hədəfimizdir. Cümhuriyyət ideyaları bizi vaz keçməməyə, indiki vəziyyətlə barışmamağa çağırır. İndi sıra bizimdir. Cümhuriyyət prinsiplərini qurucu babalarımızın istədiyi kimi bərpa etməliyik.
Əminəm ki, indi yaşadıqlarımız keçici, qısa dövr kimi tarixdə qalacaq. Atalar üçdən deyib. Sizı əmin edirəm ki, üçüncü dəfə cümhuriyyəti quracağıq və o, davamlı olacaq».