Keçid linkləri

2024, 29 Mart, Cümə, Bakı vaxtı 14:26

Qiyamətə 3 dəqiqə qalır


NASA-nın yaydığı günəş fırtınası görüntüləri
NASA-nın yaydığı günəş fırtınası görüntüləri

-

Narahat olmayın, bu düşündüyünüz qədər də real deyil. Amma o qədər utopik də deyil. İnsan əməli səbəbindən dünyanın dağılması riskini ölçən «Məhşər Saatı»nda əqrəblər 11.57-ni göstərir. Bu isə qiyamətə cəmi 3 dəqiqənin qaldığı deməkdir. 1984-cü ildən bu yana Məhşər Saatında əqrəblər saat 12-yə bu qədər yaxın olmamışdı.

ƏQRƏB 2 DƏQİQƏ İRƏLİ ÇƏKİLİB

Bu saat rəmzi xarakter daşıyır. Alimlərdən və nüvə ekspertlərindən ibarət heyət tərəfindən, nüvə müharibəsi riski nəzərə alınmaqla, müəyyən olunub. Atom Alimləri Bülletenində dərc edilir. İlk dəfə 1947-ci ildə tətbiq ediləndən indiyə qədər ayrı-ayrı vaxtlarda dəqiqə əqrəbi qiyamət vaxtı sayılan saat 12-yə 17 dəqiqə qalmışdan 3 dəqiqə qalmışadək o tərəf-bu tərəfə çəkilib.

Bu dəfə mütəxəssislər iqlim dəyişikliyinin nəzarətdən çıxmasını, nüvə silahlarının modernləşdirilməsini və dünya üzrə nüvə arsenalının artmasını bəşəriyyətin mövcudluğuna fövqəltəhlükə sayıblar. Beləliklə də, əqrəbi qiyamət vaxtına daha 2 dəqiqə yaxınlaşdırdıqlarını elan ediblər.

NÜVƏ SİLAHI FAKTORU

Məhşər Saatını ilk dəfə nüvə fiziki Alexander Langsdorfun rəssam həyat yoldaşı Martyl Langsdorf 1947-ci ildə ərinin də daxil olduğu alimlər qrupunun dərgisinin üz qabığı üçün çəkib. Həmin rəsmdə saat 11.53-ü göstərirdi. Bundan iki il sonra əri SSRİ-nin nüvə sınağı ilə əlaqədar saatın əqrəbini 4 dəqiqə irəli çəkərək, onun 11.57-ni göstərən rəsmini dərc etdirib. O vaxtdan bülletenin alimlərdən ibarət redaksiya heyəti dünyanın varlığına təhlükə törədən problemlərə diqqət çəkmək üçün saatın əqrəbini irəli-geri dəyişirlər. Bu zaman onlar müstəsna olaraq, nüvə silahının əlçatanlığı və dövlətlərin ondan istifadə ehtimalı kimi faktorları nəzərə alırlar.

Məhşər Saatının göstəricisinin dəyişdirildiyi illər və başlıca səbəbləri bunlardır:

1947. Saat 11:53 – Jurnalın təsisçilərinin dünya ictimaiyyətinə və siyasi liderlərə nüvə təhlükəsinin ciddiliyini çatdırmaq istəyi.

1949. Saat 11:57 – SSRİ-nin nüvə sınağı.

1953. Saat 11:58 – ABŞ-ın ilk termonüvə qurğusunu sınaqdan keçirməsi. Bu, o vaxtdan indiyədək saatın qiyamət anına ən çox yaxınlaşdığı tarixdir.

1960. Saat 11:53 – ABŞ və SSRİ-nin ilk dəfə olaraq, regional münaqişələrdə birbaşa qarşıdurmadan çəkinməyə meyl göstərməsi.

1963. Saat 11:48 – ABŞ və SSRİ-nin atmosferdə nüvə sınağını qadağan edən müqavilə imzalaması.

1968: Saat 11:53 – Vyetnam müharibəsi. Fransa və Çinin nüvə silahına yiyələnməsi.

1969. Saat 11:50 – İsrail, Hindistan və Pakistan istisna olmaqla, böyük dövlətlərin Nüvə silahının yayılmamasına dair Müqavilə imzalaması.

1972. Saat 11:48 – ABŞ və SSRİ-nin Strateji silahların ixtisarı və Anti-ballistik raketlər haqqında müqavilələr imzalaması.

1974. Saat 11:51 – Hindistanın ilk nüvə sınağı.

1980. Saat 11:53 – Nüvə tərksilahı istiqamətində iki superdövlətin irəliyə doğru heç bir addım atmaması.

1981. Saat 11:56 – Rusiyanın Əfqanıstana hərbi müdaxiləsi. ABŞ-ın Moskvadakı Olimpiya oyunlarını boykot etməsi. Ronald Reyganın prezident seçilməsi.

1984. Saat 11:57 – ABŞ və SSRİ arasında diplomatik münasibətlərin olduqca soyuması.

1988. Saat 11:54 – Reyganla Qorbaçovun nüvə silahının xüsusi növünü qadağan edən müqavilə imzalaması.

1990. Saat 11:50 – Berlin divarının çökməsi. Polşa, Çexoslavakiya, Macarıstan və Rumıniyanın sovet nəzarətindən çıxması.

1991. Saat 11:43 – Soyuq Müharibənin sona çatması. Dünyanın qiyamətdən ən uzaq olduğu tarix.

1995. Saat 11:46 – Dünyada hələ də 40 mindən artıq nüvə silahının qalması.

1998. Saat 11:51 – Hindistan və Pakistanın nüvə sınağı keçirmələri.

2002. Saat 11:53 – ABŞ-ın Anti-ballastik raket Müqaviləsindən birtətəfli qaydada çıxması.

2007. Saat 11:55 – Şimali Koreyanın nüvə sınağı.

2010. Saat 11:54 – ABŞ və Rusiyanın Strateji silahların ixtisarı Müqaviləsini yeniləmək üzrə danışıqlar aparması.

2012. Saat 11:55 – Dünyanın nüvə silahları, nüvə enerjisi və qlobal istiləşmə kimi bir-birlə əlaqəli mürəkkəb problemin qarşısında aciz qalması.

2015. Saat 11:57 – Nüvə silahlarının modernləşdirilməsi, iqlim dəyişikliyi və nüvə arsenalının böyüklüyü

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG