Keçid linkləri

Təcili xəbərlər
2022, 28 Yanvar, Cümə, Bakı vaxtı 22:53

Azərbaycan xəbərləri

51 100 nəfərə Prezident təqaüdləri təyin olunub

Bu il oktyabrın 1-dək 51 100 nəfərə Prezident təqaüdü təyin olunub. Bu barədə Əmək və Əhalinin Sosial Müdafiəsi Nazirliyi məlumat yayıb.

Məlumatda qeyd olunur ki, bu ilin ötən dövründə ayrı-ayrı şəxslərə təyin olunan Prezident təqaüdlərində ciddi artımlar edilib. Belə ki, müharibə əlillərinə və onlara bərabər tutulan şəxslərə Prezident təqaüdünün məbləği bu il aprelin 1-dən I qrup əlillərə 110 manatdan 150 manata, II qrup əlillərə 85 manatdan 130 manata, III qrup əlillərə 60 manatdan 100 manata çatdırılıb.

2-ci Dünya Müharibəsi iştirakçılarına, “Leninqradın müdafiəsinə görə” medalı, “Leninqrad mühasirəsində yaşayan” döş nişanı ilə təltif edilmiş şəxslərə təyin olunan Prezident təqaüdünün aylıq məbləği mayın 1-dən 55 manatdan 100 manata çatdırılıb.

I qrup əlilliyə görə sosial müavinət alan vətəndaşlara aprelin 1-dən əlavə olaraq ayda 60 manat məbləğində Prezidentinin təqaüdü təyin olunaraq ödənilir.

Bütün xəbərləri izləyin

3564 yoluxma aşkarlanıb, 19 ölüm

COVID-19-a yoluxanlardan 1004 nəfərin sağaldığı bildirilir, aktiv xəstə sayı 17 min 204-ə yüksəlib.

Son bir gündə Azərbaycanda koronavirus (COVID-19) infeksiyasına 3564 yeni yoluxma faktının qeydə alındığı, bu virusa yoluxanlardan isə 1004 nəfərin sağaldığı bildirilir.

Bu barədə yanvarın 28-də Nazirlər Kabineti yanında Operativ Qərargah məlumat yayıb. Qərargahdan açıqlanıb ki, son sutkada COVID-19 üçün götürülən analiz nümunələri müsbət çıxan 19 nəfər vəfat edib.

Qurumdan habelə vurğulandığına görə, indiyə kimi ölkədə ümumilikdə 647 min 73 nəfərin koronavirus infeksiyasına yoluxması faktı müəyyən edilib, onlardan 621 min 186-ı sağalıb, 8683-ü vəfat edib, aktiv xəstə sayı 17 min 204 -ə yüksəlib.

Son həftələr Azərbaycanda təsdiq edilən yoluxma sayında artım var.

Xatırlatma

2019-cu ilin sonlarında dünyada yeni koronavirus aşkar edilib.

2020-ci il martın 11-də Dünya Səhiyyə Təşkilatı koronavirusu pandemiya elan edib.

Dünyada sürətlə yayılan bu virusdan indiyə qədər 5.6 milyondan çox şəxsin vəfat etdiyi açıqlanıb.

Nazirlər telefonla danışıb

Məlumata görə, nazirlər, iki ölkə arasındakı münasibətlərin müxtəlif aspektlərinin inkişafından məmnunluq ifadə ediblər

Bugün, yanvarın 28-də Azərbaycan xarici işlər naziri Ceyhun Bayramovun İran İslam Respublikasının xarici işlər naziri Hüseyn Əmir Abdullahianla telefon danışığı olub.

Bu barədə Azərbaycan Xarici İşlər Nazirliyi (XİN) məlumat yayıb.

Məlumata görə, nazirlər, iki ölkə arasındakı münasibətlərin müxtəlif aspektlərinin inkişafından məmnunluq ifadə ediblər.

Vurğulandığına görə, son bir həftədə İranın yol və şəhərsalma naziri Rüstəm Qasiminin Azərbaycana, Azərbaycan müdafiə naziri Zakir Həsənovun isə İrana səfəri iki ölkə arasındakı əlaqələrin inkişafının bariz göstəricisi kimi dəyərləndirilib.

XİN qeyd edir ki, Azərbaycanla İran arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının növbəti iclasının bu ilin mart ayında Bakıda keçirilməsinin planlaşdırıldığı da söhbətdə məmnunluqla bildirilib:

“Nazirlər Azərbaycanın azad olunmuş torpaqlarında İran şirkətlərinin yaxın zamanlarda konkret layihələrlə işə başlayacağını vurğulayıb və bununla əlaqədar fikir mübadiləsi aparıblar. Tərəflər, həmçinin qarşılıqlı maraq doğuran digər regional məsələləri müzakirə ediblər”.

Azərbaycan iki il öncə işğal altında olan torpaqlarının çox hissəsini azad etdiyini açıqlayıb.

Son bir ildə həmin ərazilərdə quruculuq işlərinə başlanıb.

Almaniyadan qaytarılan şəxsin saxlandığı deyilir

Polis

Ötən il noyabrın 24-də Almaniyadan Azərbaycana readmissiya ilə göndərilən keçmiş mühacir Cəfər Mirzəyevin saxlandığı deyilir.

Bu barədə onun qardaşı Vüsal Mirzəyev yanvarın 28-də məlumat verib. Onun sözlərinə görə, C.Mirzəyevi yanvarın 27-də günorta saatlarında Ramana qəsəbəsində dükanda alış-veriş edərkən mülkigeyimli şəxslər saxlayaraq naməlum istiqamətə aparıblar: "Onun hara aparıldığı məlum deyildi. Daxili İşlər Nazirliyinin "102" xidmətinə zəng vurmuşuq. Bu gün, yanvarın 28-də məlum olub ki, Sabunçu Rayon Polis İdarəsindədir. Gəlmişik bura, amma müstəntiqlə əlaqə saxlaya bilmirik deyə, saxlanma səbəbini öyrənə bilmirik".

Bu deyilənlərə, hələlik, Daxili İşlər Nazirliyindən münasibət öyrənmək mümkün olmayıb.

Xatırlatma

Son illər Azərbaycanla Avropa İttifaqı arasında imzalanan readmissiya sazişinə əsasən, yüzlərlə mühacir Almaniyadan Azərbaycana qaytarılıb. Bundan əvvəl ötən il qaytarılanlardan iki nəfərin də narkotik ittihamı ilə saxlandığı açıqlanmışdı. Yaxınları onların şərləndiklərini desələr də, hüquq-mühafizə orqanları bununla razılaşmırdılar.

Readmissiya- ölkəsindən hansısa bir səbəblə bağlı digər ölkəyə gedən, amma orada leqallaşa bilməyən şəxslərin öz ölkəsinə geri qaytarılmasıdır.

Elman Rüstəmov bu il manatın məzənnəsinin dəyişməyəcəyini deyir

E.Rüstəmov

Azərbaycan Mərkəzi Bankının (AMB) sədri Elman Rüstəmov yanvarın 28-də keçirdiyi mətbuat konfransında manatın məzənnəsindən də danışıb. Onun vurğulamasına görə, milli valyutanın məzənnəsi bu il stabil olacaq.

2017-ci ildən Azərbaycanın milli valyutası olan manatın məzənnəsi sabit qalıb. Həmin ilin yazından 1 dollar 1 manat 70 qəpiyə bərabərdir.

Elman Rüstəmovdan inflyasiya proqnozu

Azərbaycan Mərkəzi Bankının (AMB) sədri Elman Rüstəmov yanvarın 28-də inflyasiya ilə bağlı proqnozlarını açıqlayıb. O deyib ki, bu il Azərbaycanda illik inflyasiyanın hədəf diapozonundan (2-6 faiz) yuxarı – 6.6-7.5 faiz olacağı gözlənilir. Onun sözlərinə görə, gələn il isə illik inflyasiyanın hədəf diapozonunun mərkəzinə qayıdacağını proqnozlaşdırırlar.

Dövlət Statistika Komitəsinin açıqlamasına görə, 2021-ci ildə ölkədə inflyasiya 6.7 faiz təşkil edib.

Mütəxəssislər hökumətə inflyasiya cilovlama resepti təqdim edir
Gözlə

No media source currently available

0:00 0:03:45 0:00

Mərkəzi Bank uçot dərəcəsini yüksəldib

Azərbaycan Mərkəzi Bankının (AMB) İdarə Heyəti uçot dərəcəsinin yüksəldilməsi barədə qərar qəbul edib.

Bu barədə yanvarın 28-də onlayn mətbuat konfransında AMB-nin sədri Elman Rüstəmov danışıb. Onun vurğulamasına görə, uçot dərəcəsi 7.25-dən 7.5 faizə yüksəldilib, faiz dəhlizinin aşağı həddi 6 faizdə saxlanıb, yuxarı həddi isə 8.25-dən 9-a qaldırılıb.

Bu, 2022-ci ildə maliyyə requlyatorunun uçot dərəcəsinin artırılması üzrə birinci qərardır.

Neft Fondundan Türkiyəyə 1 milyard avro...

ARDNF

Azərbaycan Dövlət Neft Fondu (ARDNF) Türkiyə Mərkəzi Bankında 1 milyard avro depozit yerləşdirib.

(Depozit- fiziki və ya hüquqi şəxsin dövlət qeydiyyatına alınan kredit təşkilatına gəlir əldə etmək üçün yerləşdirdiyi pul vəsaitidir).

"Cari ilin yanvar ayında ümumi həcmi 1 milyard avro və qaytarılma müddəti 6 ay təşkil edən depozit mərhələli şəkildə Türkiyə Mərkəzi Bankında yerləşdirilib. Türkiyədə maliyyə sabitliyinə müsbət töhfə verən bu yatırım ARDNF-nin investisiya strategiyası və qaydaları çərçivəsində həyata keçirilib və ötən gün yekunlaşıb"​, - ARDNF-in məlumatında bildirilir.

Son aylar Türkiyə milli valyutası-lirə kəskin dəyər itirir. Təkcə son üç ayda ABŞ dollarına nisbətən lirə 50 faiz civarında dəyər itirib.

2022-ci il yanvarın 1-nə olan məlumata görə, ARDNF-nin aktivləri 45 milyard 25.1 milyon ABŞ dollarına bərabər olub.

Tovuz atəşə tutulub

Azərbaycan əsgəri

Azərbaycan Müdafiə Nazirliyi ( AMN) bildirir ki, Tovuz rayonu istiqamətində mövqeləri atəşə tutulub.

Nazirlikdən vurğulandığına görə, Ermənistan silahlı qüvvələrinin bölmələri yanvarın 27-si saat 20:58-dən 23:00-dək öz mövqelərindən Azərbaycan ordusunun Tovuz rayonunun Koxanəbi yaşayış məntəqəsi istiqamətində yerləşən mövqelərini atıcı silahlardan fasilələrlə atəşə tutub: "Ordumuzun qeyd olunan istiqamətdə yerləşən bölmələri tərəfindən müvafiq tədbirlər görülüb. Azərbaycan ordusunun sıralarında şəxsi heyət və hərbi texnika baxımdan itki yoxdur".

Bu məlumata, hələlik, Ermənistan tərəfinin münasibəti bəlli deyil.

Qarabağ münaqişəsi uzun müddətdir Azərbaycan və Ermənistan arasında gərginliyə səbəb olub. Bu münaqişə müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi. 2020-ci ildə, İkinci Qarabağ müharibəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr bəyanatına (Azərbaycan, Ermənistan və Rusiya arasında) əsasən, döyüşlər dayandırılıb, Laçın (Azərbaycanın Laçın rayonu Ermənistanla sərhəddir) dəhlizində və qoşunların təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

İstər Qarabağda, istərsə də iki ölkə arasında sərhəddə atəşkəsin pozulması ilə bağlı vaxtaşırı belə məlumatlar yayılır. Bəzən itkilərin də olduğu bildirilən qarşılıqlı məlumatlarda tərəflər, bir qayda olaraq, bir-birilərini günahlandırırlar.

3361 yoluxma aşkarlanıb, 14 ölüm

COVID-19

Son gündə Azərbaycanda koronavirus (COVID-19) infeksiyasına 3 min 361 yeni yoluxma faktının qeydə alındığı, bu virusa yoluxanlardan isə 1 min 132 nəfərin sağaldığı bildirilir.

Bu barədə məlumatı yanvarın 27-də Nazirlər Kabineti yanında Operativ Qərargah yayıb. Qərargahdan açıqlanıb ki, son sutkada COVID-19 üçün götürülən analiz nümunələri müsbət çıxan 14 nəfər də vəfat edib.

Qurumdan habelə qeyd edildiyinə görə, indiyə kimi ölkədə ümumilikdə 643 min 509 nəfərin koronavirus infeksiyasına yoluxması faktı müəyyən edilib, onlardan 620 min 182-si sağalıb, 8 min 664-ü vəfat edib, aktiv xəstə sayı 14 min 663-ə yüksəlib.

Son həftələr Azərbaycanda təsdiq edilən yoluxma sayında artım var.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 5.6 milyondan çox şəxsin vəfat etdiyi açıqlanıb.

Azərbaycanın 700 yerində internet yoxdur

İnternet üçün dağa çıxan məktəblilər...
Gözlə

No media source currently available

0:00 0:03:37 0:00

Hazırda ölkədə 700-ə qədər yaşayış məntəqəsinin interneti yoxdur.

AZƏRTAC-ın xəbərinə görə, bu barədə yanvarın 27-də "Azərbaycanda rəqəmsal inkişaf və nəqliyyat sahəsi üzrə prioritetlər" mövzusunda təşkil edilən seminarda rəqəmsal inkişaf və nəqliyyat nazirinin müavini Rövşən Rüstəmov danışıb.

O bildirib ki, həmin yaşayış məntəqələri ucqar və uzaq yer olduğu üçün əsas yük "Aztelekom" MMC və "Baktelekom" MMC üzərində qalacaq. Onun vurğulamasına görə, bu iki qurumun birləşdirilməsinin müsbət tərəflərindən biri odur ki, Bakıda və regionlarda yığılan ödənişlər ucqar yaşayış məntəqələrinin internet probleminə sərf olunacaq.

Yaxın günlərdə iki dövlət rabitə operatoru- "Aztelekom"la "Baktelecom"un da birləşdiriləcəyi gözlənir. Bunu da nazir müavini R.Rüstəmov həmin çıxışında söyləyib. Onun sözlərinə görə, hazırda bu istiqamətdə hüquqi prosedurlar yerinə yetirilir.

'Azdrama' bağlanıb

Dövlət Akademik Milli Dram Teatrı

Azərbaycan Dövlət Akademik Milli Dram Teatrı əməkdaşları koronavirusa yoluxduğuna görə fəaliyyətini müvəqqəti dayandırıb.

Bu barədə "Turan"a teatrdan məlumat verilib.

Bildirilib ki, yanvarın 23-dən fevralın 7-dək teatrın öz iş fəaliyyətini müvəqqəti dayandırması haqqında qərar qəbul olunub: "Qeyd olunan tarixlərə təyin edilmiş tamaşa nümayişləri və məşqlər təxirə salınır. Həmin tarixlərdə nəzərdə tutulan tamaşalar fevralın 7-dən etibarən nümayiş olunacaq".

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 5.6 milyondan çox şəxsin vəfat etdiyi açıqlanıb. Azərbaycanda isə indiyə kimi ümumilikdə 636 min 956 nəfərin koronavirusa yoluxma faktının müəyyən edildiyi, onlardan 8 min 632-nin vəfat etdiyi bildirilib. Son həftələr ölkədə rəsmən bu virusa yoluxmada artım olduğu vurğulanır.

Maqsud Mahmudovun işi məhkəmədədir

M.Mahmudov

Ötən il beynəlxalq axtarışa verilən və Ukraynada tutularaq Azərbaycana gətirilən işadamı Maqsud Mahmudovun məhkəməsi başlayır.

Bu barədə məlumatı "Turan"a Bakı Ağır Cinayətlər Məhkəməsindən də təsdiqləyiblər. İş hakim Faiq Qəniyevin icraatına verilib.

M.Mahmudov Cinayət Məcəlləsinin 178.3.2 (Dələduzluq -külli miqdarda ziyan vurmaqla törədildikdə) və 183.2.2-ci (Xüsusi dəyəri olan əşyaları talama - təkrar törədildikdə) maddələri ilə təqsirləndirilir. İttihamlar sübuta yetirilmiş sayılarsa, ona 15 ilə qədər həbs cəzası verilə bilər.

Hələlik, ittihamlara M.Mahmudovun özü və yaxınlarından münasibət almaq mümkün olmayıb.

M.Mahmudov 2021-ci ilin sentyabrında Ukraynada tutularaq Azərbaycana gətirilib.

Xatırlatma

Bir sıra media orqanlarında 53-yaşlı M.Mahmudovun Ukraynada hələ ötən ilin aprelində saxlandığı açıqlanmışdı. Onun 2019-cu ildən Ukraynaya gəldiyi və siğınacaq almaq istədiyi vurğulanırdı. Amma o, həmin vaxt Azərbaycana təhvil verilməmişdi.

M.Mahmudov Azərbaycanda ictimaiyyətin fəal kəsiminə müxalifətin aksiyalarından tanış idi. O, müxalifətin təşkil etdiyi mitinqlərə gəlib, özünü hakimiyyətin müdafiəçisi kimi təqdim edirdi.

2019-cu ildə isə o, Azərbaycanı tərk etdikdən sonra həmin əməllərinə görə üzr istəmiş və bunu məcburiyyətdən etdiyini bildirmişdi. M.Mahmudov beynəlxalq axtarışa verildikdən sonra da açıqlama yayaraq bunu əvvəlki hərəkətindən peşman olması və üzr istəməsinə cavab tədbiri kimi dəyərləndirmişdi.

Sayt rəhbərinin aclığı dayandırdığı bildirilir

Polad Aslanov

Həkimlər deyiblər ki, aclığı davam etdirərsə, Polad Aslanovun səhhətində ciddi problemlər yarana bilər

Həbsdə olan xeberman.com saytının rəhbəri Polad Aslanovun həkimlərin israrlı tövsiyələrindən sonra yanvarın 25-də aclıq aksiyasını dayandırdığı deyilir.

Bu barədə onun həyat yoldaşı Gülmirə Aslanova bildirib.

Onun sözlərinə görə, bugün, yanvarın 25-də yoldaşı özü zəng edib və aclığı dayandırdığını təsdiq edib: "Onun sözlərinə görə, qan təhlilləri çox pis çıxıb.”

Xanımının vurğulamasına görə, həkimlər deyiblər ki, aclığı davam etdirərsə, Polad Aslanovun səhhətində ciddi problemlər yarana bilər.

Bu məlumatı, hələlik, rəsmi qurumlardan dəqiqləşdirmək mümkün olmayıb.

Aslnovun yanvarın 6-dan bu aksiyaya başladığı və onun işinin yenidən araşdırılmasını tələb etdiyi bildirilirdi.

Xatırlatma

Xeberman.com saytının təsisçisi və baş redaktoru Polad Aslanov 2019-cu il iyunun 12-də saxlanıb. O, Cinayət Məcəlləsinin 274-cü (dövlətə xəyanət) maddəsi ilə ittiham olunub.

Həmin ilin noyabrında Polad Aslanov 16 il azadlıqdan məhrum edilib. O, özünü təqsirli bilmir.

İlham Əliyev: 'Ermənistandan da müsbət xəbərlər alırıq'

Prezident İlham Əliyev İranın yol və şəhərsalma nazirini videoformatda qəbul edib

"Siz dünən, eyni zamanda, Zəngəzur dəhlizinin yaradılması üçün aparılan işlərlə də tanış olmusunuz. Həm avtomobil yolu, həm dəmir yolu artıq uğurla inşa edilir və Ermənistandan da biz müsbət xəbərlər alırıq".

Bunu Prezident İlham Əliyev yanvarın 25-də İranın Yol və Şəhərsalma naziri Rüstəm Qasimini videoformatda qəbul edərkən deyib. Onun sözlərinə görə, Ermənistan öz tərəfində də bu işlərə start verməyi planlaşdırır.

O əlavə edib ki, regional əməkdaşlığın yaradılması üçün hazırda çox ümidverici 3+3 (Azərbaycan, İran, Rusiya, Türkiyə, Ermənistan və Gürcüstan) əməkdaşlıq platforması yaradılıb: "Eyni zamanda, əminəm ki, yaxın gələcəkdə İran şirkətləri azad edilmiş torpaqlarda fəal işə başlayacaqlar. İqtisadiyyat Nazirliyinə müvafiq göstərişlər verildi, İran tərəfi ilə ilkin danışıqlar aparıldı və indi konkret nəticələr gözləyirik".

Prezidentin vurğulamasına görə, Ermənistan işğal dövründə Azərbaycanın şəhərlərini, kəndlərini yerlə-yeksan edib: "Ona görə bu böyük ərazidə - 10 min kvadratkilometrdən böyük olan ərazidə indi quruculuq işlərinə start verildi, amma gördüyünüz kimi, bu, çox genişmiqyaslı bir işdir. Yüzlərlə şəhər və kənd demək olar ki, yer üzündən silinib. Bərpa işlərinə start verildi və, dediyim kimi, ümid edirəm ki, İran şirkətləri bu işlərdə fəal iştirak edəcəklər".

İranlı nazir R.Qasimi isə deyib ki, azad edilmiş ərazilərdə aparılan quruculuq və yenidənqurma işləri ilə dünən yerində tanış olublar: "Ümid edirəm ki, bu gün cənab Şahin Mustafayevlə və eləcə də Azərbaycan Respublikasının digər nazirləri ilə keçirəcəyim görüşlərdə iki ölkə arasındakı əlaqələr və müştərək layihələr barədə bir daha fikir mübadiləsi aparacağıq".

Xatırlatma

2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə (Şuşa şəhəri daxil) və ətraf 7 rayona (Zəngilan və Füzuli rayonları daxil) nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir. Ötən il isə Azərbaycan, Ermənistan və Rusiya rəhbərliyi bölgədə nəqliyyat və iqtisadi əlaqələrin inkişafına dair daha iki bəyanat imzalayıblar.

Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Azərbaycanın müdafiə naziri İrana gedib

Z.Həsənov

Azərbaycanın Müdafiə naziri Zakir Həsənov İran İslam Respublikasına səfər edib.

Azərbaycan Müdafiə Nazirliyinin yaydığı məlumata görə, İran Silahlı Qüvvələrinin Baş Qərargah rəisi general-leytenant Məhəmməd Hüseyn Baqerinin dəvəti ilə gerçəkləşən bu səfər yanvarın 25-də başlayıb.

"Müdafiə naziri general-polkovnik Z.Həsənovun İranın bir sıra dövlət rəsmiləri ilə görüşü və tədbirlərdə iştirakı planlaşdırılır", - məlumatda yazılıb.

Baş Prokurorluq xaricdə əmlak müsadirəsinə başlayıb

Kollegiya iclası (foto arxiv)

Xarici ölkələrdə təqsirləndirilən şəxslərə məxsus əmlakın müsadirəsi prosesinə başlandığı bildirilir.

"Turan"ın xəbərinə görə, bu barədə Baş prokuror Kamran Əliyev bu gün, yanvarın 24-də qurumun 2021-ci ilin yekunlarına həsr olunmuş kollegiya iclasında danışıb.

İclasda bildirilib ki, ötən il xüsusi müsadirə sahəsində aktivlərin aşkarlanması və izlənməsi nəticəsində müttəhimlərə məxsus 227 daşınmaz əmlak, 83 torpaq sahəsi, 314 nəqliyyat vasitəsi, müxtəlif banklarda 51 kart hesabı və 22 cari hesab müəyyən edilib.

"Eyni zamanda, xarici ölkələrdə yerləşən əmlakların müsadirə edilməsi məqsədilə zəruri tədbirlərin görülməsinə başlanılıb", - Baş prokuror bildirib.

Cinayətlərin 87.3 faizi açılıb

Yanvarın 24-də Azərbaycan Baş Prokurorluğunda 2021-ci ilin yekunlarına və qarşıda duran vəzifələrə həsr olunmuş geniş kollegiya iclası başlayıb.

İclasda Baş Prokuror Kamran Əliyev çıxış edib. O deyib ki, prokurorluq və daxili işlər orqanlarının qarşılıqlı, effektiv əməkdaşlığı nəticəsində ötən il qeydə alınmış 31 min 131 cinayətin 87.3 faizinin açılması təmin olunub.

K.Əliyev habelə vurğulayıb ki, ötən il Baş Prokurorluğun İstintaq idarəsində 328 cinayət işinin ibtidai istintaqı aparılıb və 120 şəxs barəsində 96 cinayət işinin istintaqı yekunlaşdırılıb. Onun deməsinə görə, bunlardan 24 şəxs barəsində 17 iş qəsdən adamöldürmə faktları ilə bağlı olub.

Baş prokuror həmçinin bildirib ki, ibtidai istintaqı tamamlanan cinayət işləri üzrə 67 milyon 165 min manat maddi ziyanın ödənilməsi təmin edilib.

2020-ci illə müqayisə

2020-ci ildə isə Baş Prokurorluq ölkədə qeydə alınan cinayətlərin sayını xeyli az 26 min 4 açıqlamışdı. Qurumdan bildirilmişdi ki, onların 84.3 faizinin açılması təmin olunub.

Bakı-Şuşa sərnişin avtobusu yola düşüb

Bakı Avtovağzalı

Bu gün, yanvarın 24-də Bakı-Şuşa- Bakı sərnişin avtobusu yola düşüb.

İlk sərnişin marşrutu Bakı Beynəlxalq və Şəhərlərarası Avtovağzal Kompleksindən 06:30-da Şuşa istiqamətinə hərəkət edib.

İlk olaraq Şuşaya iki marşrut avtobusu xəttə buraxılıb.

Şuşa ilə yanaşı, Bakı Avtovağzalından Bakı-Ağdam-Bakı marşrutları da start götürüb.

Bakıdan azad olunan ərazilərə avtobus reysləri həftə ərzində cədvəl üzrə hərəkət edəcək. Amma hər kəs ildə bir dəfə səfər edə biləcək və bu, avtobusların sayı ilə izah edilir. Qeyd olunub ki, hazırda hər kəs işğaldan azad edilmiş ərazilərə səfər etmək istəyir, amma avtobusların sayı buna imkan vermir.

Bakı-Şuşa üzrə biletin qiyməti -10.40 manat, Bakı-Ağdam - 9.40 manat, Əhmədbəyli-Şuşa - 7 manat, Bərdə-Ağdam - 5 manat, Füzuli Hava Limanı-Şuşa üzrə isə 6 manat açıqlanıb.

Xatırlatma

2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə (Şuşa şəhəri daxil) və ətraf 7 rayona (Ağdam və Füzuli rayonları daxil) nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Xankəndindən xəstə helikopterlə Yerevana aparılıb-Azərbaycanın razılığından sonra

Rusiyanın Mi-8 hərbi vertolyotu Rusiya sülhməramlı qüvvələrinin hərbi maşınlarını Xankəndinə doğru hərəkət edərkən patrul edir, 14 noyabr 2020

Ağr vəziyyətdə olan 17 yaşlı Xankəndi sakini Qarabağdakı Rusiya sülhməramlı kontingentinin hərbi aviasiya helikopteri ilə Yerevana çatdırılıb.

Bu barədə yanvarın 22-də Rusiya Müdafiə Nazirliyi məlumat yayıb.

Məlumatda qeyd olunur ki, Azərbaycan tərəfi ilə razılaşdırılmaya əsasən hərbi pilot və həkimlər 17 yaşlı Dağlıq Qarabağ sakinini uşaq xəstəxanasının reanimasiya şöbəsindən götürərək Yerevandakı Erebuni hərbi aerodromuna təxliyə ediblər.

“Rusiya sülhməramlı kontingentinin tibbi dəstəsi yol-nəqliyyat hadisəsi nəticəsində onurğası ağır zədələnmiş 17 yaşlı gəncin sanitar təxliyyəsini həyata keçirib. Stepanakert (Xankəndi) şəhərində xüsusi yardım göstərmək mümkün olmadığı üçün gənc İrəvan şəhərindəki ixtisaslaşdırılmış tibb müəssisəsinə aparılıb”, - Rusiya sülhməramlı kontingentinin nümayəndəsi İvan Voronin bildirib.

Məlumatda deyilir ki, 17 yaşlı gənc ötən gün bədbəxt hadisə nəticəsində müxtəlif dərəcəli bədən xəsarətləri alıb. Yeniyetmənin valideynləri Rusiya sülhməramlı kontingentinin təyyarədən istifadə etməklə İrəvandakı ixtisaslaşmış tibb müəssisəsinə təcili təxliyə edilməsi üçün ictimai qəbula müraciət ediblər.

Xatırlatma

2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə (Şuşa şəhəri daxil) və ətraf 7 rayona (Ağdam və Füzuli rayonları daxil) nəzarəti bərpa edib.

Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib.

Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib.

1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Ötən il Bakıda ağır və xüsusilə ağır cinayətlərin sayında 62,9 faiz artım olub -rəsmi

Polis əməkdaşı hadisə yerindən cinayətin törədilməsində istifadə olunan vasitələri toplayır, London, 23 may 2013

Müşavirədə narkotik vasitələrin qanunsuz dövriyyəsi və satışı ilə bağlı 2,1 dəfə artım qeydə alındığı qeyd olunub və bildirilib ki, bu qədər yüksək artım dinamikası olduqca narahatedici göstəricidir

" 2021-ci ildə Bakı şəhərinin daxili işlər orqanları və prokurorluq orqanları üzrə cəmi 12 min 761 cinayət hadisəsi qeydiyyata alınıb. Bu, ötən illə müqayisədə 2252 hadisə, yəni, 21,4 faiz çoxdur".

Rəsmi informasiya agentliyi Azərtac-ın yazdığına görə, bu barədə rəsmi statistika yanvarın 21-də Bakı Şəhər Prokurorluğunun 2021-ci ilin yekunlarına həsr olunmuş əməliyyat müşavirəsində açıqlanıb.

Açıqlanan məlumatlarda qeyd olunur ki, ötən il Bakı şəhərinin daxili işlər orqanları və prokurorluq orqanları üzrə böyük ictimai təhlükə törətməyən, az ağır, ağır və xüsusilə ağır cinayətlərin sayında artım müşahidə olunub.

"Belə ki, il ərzində böyük ictimai təhlükə törətməyən cinayətlərin sayı 110 hadisə, yaxud 4,1 faiz artaraq 2792 olub. Az ağır cinayətlərin sayı 1230 hadisə, yaxud 19,3 faiz artaraq 7608 hadisə, ağır və xüsusilə ağır cinayətlərin sayı isə 912 hadisə, yaxud 62,9 faiz artaraq 2361 hadisə olub. Paytaxtın daxili işlər və prokurorluq orqanları üzrə cinayətlərin açılma göstəricisi 86,3 faiz olub ki, bu da ötən illə müqayisədə 5,4 faiz çoxdur" -məlumatda bildirilir.

Müşavirədə narkotik vasitələrin qanunsuz dövriyyəsi və satışı ilə bağlı 2,1 dəfə artım (dövriyyə 1841 fakt, satış 750 fakt) qeydə alındığı qeyd olunub və bildirilib ki, bu qədər yüksək artım dinamikası olduqca narahatedici göstəricidir.

Məlumatda qeyd olunur ki, Bakı şəhər prokuroru İlqar Abbasov çıxışında narkotik maddələrin satışı ilə məşğul olan mənbələrin müəyyən edilməsi ilə bağlı əməliyyat–istintaq tədbirlərinin həyata keçirilməsi istiqamətində fəaliyyətin daha da gücləndirilməsini Bakı şəhərinin tabe rayon prokurorlarından tələb edib.

Müşavirədə ölümlə nəticələnən yol-nəqliyyat hadisələri ilə bağlı məlumatlar da açıqlanıb. Bildirilib ki, 2021-ci ildə 197 ölümlə nəticələnən yol-nəqliyyat hadisəsi qeydə alınıb (2020-də 160 ölüm). Məlumata görə, bu qəbildən olan cinayət işlərindən 100-ü məhkəməyə göndərilib, hadisəni törədən şəxsin ölməsi səbəbindən 50 iş üzrə icraata xitam verilib.

Müşavirədə 2021-ci il şəhər prokurorluq orqanlarının əməkdaşlarından məsuliyyətə cəlb edilməsi və mükafatlandırlması ilə bağlı rəqəmlər də açıqlanıb.

"...əmək və icra intizamını pozan 14 nəfər intizam məsuliyyətinə cəlb edilmişdir ki, onlardan 1 nəfər tutduğu vəzifədən azad olunmuş, 1 nəfərə şiddətli töhmət, 5 nəfərə töhmət elan edilmiş, 7 nəfərə irad tutulub. Həmçinin Azərbaycan Respublikası Baş prokurorunun əmrləri ilə xidməti fəaliyyətində fərqləndiklərinə görə Bakı şəhər prokurorluq orqanlarının əməliyyat işçilərindən 18 nəfər mükafatlandırılıb"-məlumatda bildirilir.

Pensiyaçıların azalması davam edir

Dövlət kimlərin pensiyasını geri alacaq?
Gözlə

No media source currently available

0:00 0:04:07 0:00

2022-ci ilin əvvəlinə Azərbaycanda pensiyaçıların sayı 1 milyon 197 min nəfər olub. Bu da ölkə əhalisinin 11.9 faizini təşkil edib.

Bu barədə "Turan"a Dövlət Statistika Komitəsindən (DSK) məlumat verilib.

6 aya 17 min azalma...

Altı ay öncə, 2021-ci il iyulun 1-i Dövlət Sosial Müdafiə Fondunda 1 milyon 214.1 min pensiyaçı qeydiyyatda olmuşdu. Həmin məlumatı da DSK yaymışdı. Komitənin məlumatına görə, bu da ölkə əhalisinin 12.1 faizini təşkil edirdi: "Onların 58.8 faizi yaşa, 29.5 faizi əlilliyə, 11.7 faizi isə ailə başçısını itirməyə görə pensiya alır…".

2017-ci ildə Azərbaycanda pensiya yaşı artırılıb. Qanunvericiliyə edilən dəyişikliyə əsasən, kişilərdə 63 yaş həddi 2017-ci il yanvarın 1-dən başlayaraq 2021-ci il yanvarın 1-dək, qadınlarda isə 60 yaş 2027-ci il yanvarın 1-dək hər il 6 ay artırılmaqla 65 yaşa çatdırılmalıdır.

Son 4 il yarımda ildə 130 mindən çox azalma

Son 4 il 6 ayda Azərbaycanda pensiyaçıların sayında azalma başlayıb. Rəsmi rəqəmlərə görə, 2017-ci il iyulun 1-i vəziyyətinə Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunda 1 milyon 328.4 min nəfər pensiyaçı qeydiyyatda olub.

Ötən ilin sonlarına doğru Azərbaycanda orta aylıq pensiya 330 manata yaxın olub. 2022-ci ildə bu məbləğin 14 manat artacağı proqnozlaşdırılır. 2017-ci ildə isə bu rəqəmin təxminən 252 manat olduğu açıqlanmışdı.

Baş prokuror 'Tərtər işi'ndən danışdı

K.Əliyev

Baş prokuror Kamran Əliyev bu gün, yanvarın 20-də "Tərtər işi"ndən və istintaqın gedişindən danışıb. O deyib ki, həmin iş ilə bağlı istintaq qrupu yaradılıb və intensiv istintaq hərəkətləri aparılır.

O əlavə edib ki, heç kim bu işdən siyasi məqsədlər üçün istifadə edə bilməz: "Bu, yolverilməzdir".

Baş prokurorun sözlərinə görə, istintaq belə qısa müddətdə və tələskənliklə aparıla bilməz: "Təəssüf ki, bəzi şəxslər bu mövzunu istismar etməyə çalışırlar. Bildi-bilmədi qeyri-peşəkar formada çalışırlar ki, istintaq prosesinə təsir etsinlər. Bu da yolverilməzdir, mümkün də deyil".​

2021-ci ilin sonunda Baş Prokurorluq 2017-ci ildə baş verən və "Tərtər işi" adlandırılan məsələlərin yenidən araşdırıldığını açıqlamışdı.

'Azərbaycan hərbçilərini soyundurub toka veriblər'
Gözlə

No media source currently available

0:00 0:08:50 0:00

"Tərtər işi" nədir

2017-ci il mayın 7-də Azərbaycanın hüquq-mühafizə orqanları bildirdilər ki, Ermənistan xüsusi xidmət orqanlarının xeyrinə casusluqda günahlandırılan bir qrup hərbi qulluqçu və mülki şəxs həbs edilib. Birgə rəsmi açıqlamada vurğulanırdı ki, Hərbi Prokurorluqda Cinayət Məcəlləsinin 274-cü (dövlətə xəyanət) maddəsi ilə cinayət işi açılıb. Sonradan bir sıra media orqanları və sosial şəbəkələrdə bu iş üzrə saxlanan bəzi şəxslərin dindirilmədə işgəncə nəticəsində ölməsi ilə bağlı məlumatlar yayıldı. Baş Prokurorluq da həmin iddiaların yer aldığı bəzi sayt rəhbərlərini çağıraraq onlara rəsmi olmayan bu məlumatları yaydıqlarına görə xəbərdarlıq verdi. Lakin bu yaxınlarda Hərbi Prokurorluğun rəhbərliyi həmin proses zamanı ölüm halının olduğunu etiraf edib.

Saxlanan hərbi qulluqçuların yaxınları da deyir ki, sonradan işgəncə verilməsinə görə də mühakimə edilənlər olub. Üstəlik, onların vurğulamasına görə, işgəncə nəticəsində ölənlərin 5-nə də sonradan bəraət verilib.

Müdafiə tərəfinin açıqlamalarına görə, bu cinayət işlərində tutulanların əksəriyyəti özlərini təqsirli bilməyib və həbs olunarkən ağır işgəncələrə məruz qaldıqlarını, bu üzdən etiraf xarakterli ifadələrə imza atdıqlarını iddia ediblər.

20 Yanvarda həlak olanların ailələrinə yardım veriləcək

Bakıda tanklar. 1990

20 Yanvar faciəsi zamanı həlak olanların ailələrinə və o hadisələrdə əlil qalanlara birdəfəlik maddi yardım ediləcək.

Bu barədə bu gün, yanvarın 19-da Əmək və Əhalinin Sosial Müdafiəsi Nazirliyi məlumat yayıb.

Məlumatda bu, 20 Yanvar faciəsinin 32-ci ildönümü ilə əlaqələndirilir: "Bu kateqoriyalara aid ümumilikdə 333 nəfərin hər birinin bank hesabına 200 manat məbləğində birdəfəlik maddi yardım köçürülüb".

Açıqlamaya görə, Bakıda qeydiyyatda olanlar Beynəlxalq Bankın (ABB) Bakıdakı, digər şəhər və rayonlarda qeydiyyatda olanlar isə onun ərazilər üzrə filiallarına şəxsiyyət vəsiqəsi ilə müraciət edərək birdəfəlik maddi yardımı almaq üçün bank kartlarını götürə bilərlər.

Xatırlatma

1990-ci il yanvarın 19-dan 20-nə keçən gecə ozamankı SSRİ rəhbərliyinin göstərişi ilə Bakıya ordu yeridilib. 35 minlik ordu korpusunun apardığı əməliyyat "Zərbə" adlanırdı. Azərbaycanın rəsmi qurumları həmin günlərdə Bakıda və respublikanin bir sıra bölgələrində SSRİ ordusunun 130-dan çox dinc sakini öldürdüyünü, 700-dən çox adama isə müxtəlif dərəcəli xəsarətlər yetirdiyini açıqlayıblar.

Teymur Musayev səhiyyə naziri təyin edildi

Teymur Musayev

Teymur Musayev Azərbaycan Respublikasının Səhiyyə naziri təyin edilib.

Bununla bağlı bu gün, yanvarın 19-da Prezident İlham Əliyev sərəncam imzalayıb.

T.Musayev bu təyinata qədər Səhiyyə nazirinin birinci müavini postunu tuturdu. O, eyni zamanda nazir vəzifəsini icra edirdi.

Ondan əvvəlki Səhiyyə naziri Oqtay Şirəliyev ötən ilin aprelindən o vəzifədən kənarlaşdırılmışdı. O.Şirəliyev düz 16 il o vəzifədə qalmışdı.

Goranboy sakini minaya düşüb

Vüqar Məmmədovun kənd təsərrüfatı fəaliyyəti ilə məşğul olarkən minaya düşməsi nəticəsində sol ayağının travmatik amputasiya olunması müəyyən edilib

Yanvarın 18-də Vüqar Məmmədov adlı şəxsin Goranboy rayonunun Tapqaraqoyunlu kəndinin yaxınlığındakı ərazidə piyada əleyhinə minaya düşdüyü bildirilir.

Bu barədə rayon prokurorluğuna məlumat daxil olub.

Goranboy Rayon Prokurorluğundan AZƏRTAC-a verilən məlumata görə, prokurorluq əməkdaşları hadisə yerinə baxış keçirib, məhkəmə-tibb ekspertizası təyin edilib, digər prosessual hərəkətlər yerinə yetirilib.

Vurğulandığına görə, aparılmış araşdırmalarla Vüqar Məmmədovun kənd təsərrüfatı fəaliyyəti ilə məşğul olarkən minaya düşməsi nəticəsində sol ayağının travmatik amputasiya olunması müəyyən edilib.

Faktla bağlı Goranboy Rayon Prokurorluğunda araşdırma aparılır.

Həmin şəxsin 1996-cı ildə doğulduğu və yerli sakinlərdən olduğu bildirilir.

Rəsmi açıqlamaya, hələlik, ondan və ya yaxınlarından münasibət almaq mümkün olmayıb.

Goranboy rayonunun Tapqaraqoyunlu kəndi Azərbaycanın uzun illər münaqişə yaşanan Qarabağ bölgəsinə yaxın ərazidə yerləşir.

Xatırlama

Qarabağ münaqişəsi müasir mərhələdə 1988-ci ildə başlayıb.

Daha sonra Ermənistan və Azərbaycan arasında sialahlı toqquşmalar baş verib.

1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

2020-ci ildə, İkinci Qarabağ müharibəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib.

Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın (Azərbaycanın Laçın rayonu Ermənistanla sərhəddir) dəhlizində və qoşunların təmas xəttində Rusiya sülhməramlıları yerləşdirilib.

Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

'AzərSuTikinti' Xəstəxanasının işçiləri narazıdır

Etiraz

Dünən, yanvarın 17-də "AzərSuTikinti" Xəstəxanasının işçiləri xəstəxananın bağlanacağı ilə bağlı deyilənlərə etiraz ediblər. Onların sözlərinə görə, bu, Bakının Nizami rayonunda yerləşən yeganə dövlət xəstəxanasıdır: "Biz Nizami rayonunda olan yeganə dövlət xəstəxanasının bağlanmasına etiraz edirik. Nəyə görə bağlanmalıdır?".

Onlar qeyd edib ki, koronavirus pandemiyası dövründə xəstəxananın bağlanması doğru deyil: "Prezidentimizdən xahiş edirik bununla maraqlansın və səsimizə səs versin".

TƏBİB-dən cavab...

Tibbi Ərazi Bölmələrini İdarəetmə Birliyinin (TƏBİB) İctimaiyyətlə əlaqələr şöbəsinin rəhbəri Elnarə Baxış "Turan"a bildirib ki, hemodializ şöbəsi yerində saxlanmaqla, dörd cərrah, üç həkim-ginekoloq, iki lor həkimin fəaliyyətini Sabunçu Tibb Mərkəzində davam etdirməsi nəzərdə tutulub: "Digər tibbi heyət, o cümlədən nevroloji, terapiya, qəbul, reanimasiya, laboratoriya şöbələri Nizami Tibb Mərkəzinin yeni binasına köçürüləcək və fəaliyyətlərini orada davam etdirəcəklər".

O qeyd edib ki, sözügedən məsələlər ştat cədvəlinin tərtibi zamanı nəzərə alınıb.

YAP funksionerinin intim görüntülərinə görə sayt rəhbəri cəzalandırıldı

Nəsimi Rayon Məhkəməsi

azadinfo.az saytının təsisçisi Mahir Ələkbərov (Xəttab) 3 il 6 ay azadlıqdan məhrum edilib. Yanvarın 18-də Nəsimi Rayon Məhkəməsində çıxarılan hökmə əsasən, o, Yeni Azərbaycan Partiyasının (YAP) Binəqədi rayon təşkilatının keçmiş sədri Ramiz Göyüşovu intim xarakterli videogörüntülərlə şantaj etməkdə suçlu sayılıb.

Cinayət işinin materiallarında iddia olunur ki, Göyüşovun şəxsi həyatına aid görüntülər gizli yolla çəkilərək yayılıb. Həmin görüntüləri rəhbərlik etdiyi saytda da yayımlayan Mahir Xəttab onların silinməsi üçün YAP funksionerindən 2 min manat pul tələb edib. İttihama əsasən, sayt rəhbəri tələb etdiyi pulu Göyüşovdan alıb.

Lakin Ələkbərov ittihamı rədd edir, özünü təqsirli bilmir. O, hökmdən öncə son sözündə də ittihamın əsassız olduğunu, Göyüşovu şantaj edib ondan pul almadığını deyib. O, bəraət hökmü çıxarılmasını istəyib.

Lakin məhkəmə belə nəticəyə gəlib ki, ona qarşı irəli sürülən ittiham təsdiqini tapıb.

Göyüşovun şəxsi həyatına aid görüntülər yayılandan bir neçə gün sonra o, YAP-dakı vəzifəsindən də, ümumiyyətlə, partiyadan da çıxarılıb.

Şuşanı könlü istəyən bir dəfə...

Bakı Avtovağzalı

İşğaldan azad olunmuş ərazilərə hər kəs ildə bir dəfə səfər edə biləcək və bu, avtobusların sayı ilə izah edilir.

Bu barədə "Turan"a Rəqəmsal İnkişaf və Nəqliyyat Nazirliyindən bildirilib.

Qeyd olunub ki, hazırda hər kəs işğaldan azad edilmiş ərazilərə səfər etmək istəyir, amma avtobusların sayı buna imkan vermir: "Bu səbəbdən də hər bir şəxsin ildə bir dəfə səfər etməsi şərt kimi qoyulub. Prosesin gedişində avtobusların sayı artırıla bilər".

Qurumdan vurğulanıb ki, səfər edənlər gediş-dönüş biletini eyni anda almalıdır: "Ərazidə minalanmış yerlər ola bilər və bu fəsadlara gətirə bilər. Bu səbəbdən də belə şərt qoyulub".

Bildirilib ki, səfərlər yalnız ölkə vətəndaşlarına aiddir, gələcəkdə lazım gələrsə, xarici ölkələrin vətəndaşları üçün turizm səfərləri təşkil olunacaq.

Şuşa və Ağdama biletin qiyməti açıqlanıb

Yanvarın 24-dən Bakı-Şuşa, Bakı-Ağdam, Əhmədbəyli-Şuşa, Füzuli Hava Limanı-Şuşa, Bərdə-Ağdam müntəzəm avtobus marşrutları istifadəyə veriləcək.

Bu barədə məlumatı Dövlət Avtomobil Nəqliyyatı Xidmətindən "Turan"a təsdiqləyiblər.

Bildirilib ki, COVID pasportu olan hər bir vətəndaş bu imkandan istifadə edə biləcək. Bilet alışı onlayn qaydada da mümkün olacaq.

Əhmədbəyli-Şuşa istiqamətində səfərlər həftədə dörd dəfə, digər istiqamətlər üzrə həftədə iki dəfə həyata keçiriləcək.

Bakı-Şuşa üzrə biletin qiyməti 10 manat, Bakı-Ağdam - 9.40 manat, Əhmədbəyli-Şuşa - 7 manat, Bərdə-Ağdam - 5 manat, Füzuli Hava Limanı-Şuşa üzrə isə 6 manat olacaq.

Avtobuslar saat 06:30-da Bakı Avtovağzalından çıxacaq.

Xatırlatma

2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə (Şuşa şəhəri daxil) və ətraf 7 rayona (Ağdam və Füzuli rayonları daxil) nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Davamı

XS
SM
MD
LG