İsveçin xarici işlər naziri Carl Bildt Ukrayna prezidenti Petro Poroshenko ilə görüşüb, Kiyevin AB ilə assosiasiya sazişini yerinə yetirməsini müzakirə edib. İyulun 1-də Kiyevdə keçirilən görüşdən sonra Poroshenko deyib ki, Ukrayna iyulun 11-də AB, Ukrayna və Rusiya təmsilçiləri ilə görüşəcək, həmin sazişin iqtisadi aspektlərini müzakirə edəcək.
Poroshenko jurnalistlərə deyib: «Sazişin mahiyyəti barədə mövqeyimiz aydındır: o, müzakirə oluna bilməz. Ancaq onun mərhələlərini müzakirə edə bilərik».
Ukrayna Rusiyanın etirazlarına baxmayaraq, AB ilə martın 21-də assosiasiya sazişi, iyunun 27-də isə azad ticarət razılaşması imzalayıb.
Prezidentin ofisinin məlumatına görə, tərəflər Ukraynanın Avropaya inteqrasiyası, Donbasda durumun sabitləşdirilməsi üçün cəhdlərin koordinasiyasına razılaşıblar.