Slavyanskın yeni «xalq meri» Ukrayna hökuməti ilə danışıqlara hazır olduğunu deyib. Vladimir Pavlenko Donetskdə ATƏT təmsilçiləri ilə görüşdə bildirib.
ATƏT-in Ukraynanın şərqində işləyən xüsusi monitorinq missiyası son hesabatında bu barədə yazıb.
Pavlenko hesab edir ki, danışıqlar üçün həmişə imkan var və durumun güc yolu ilə həllinə yer qalmamalıdır.
«Xalq meri»nin sözlərinə görə, Slavyansk hərbi əməliyyatların mərkəzinə çevriləndən sonra, şəhərin 130 min nəfərlik sakinindən 60 mini qalıb. Onlardan 15 mini şəhəri tərk etmək istəyir, onlar üçün sülh koridoru yaratmaq lazımdır.
Separatçılar əvvəlki meri büdcədən düzgün istifadə etmədiyinə görə vəzifədən uzaqlaşdırıb.