Ermənistan və Rusiyanın yolları ayrılır?

-

Bir həftə əvvəl Ermənistanda gənc fəallar ictimai nəqliyyatda gediş haqqının artırılmasına etiraz olaraq aksiyalar keçirdilər.

Bundan qabaq isə daha böyük etiraz aksiyaları olmuşdu. Səbəb Rusiyanın Ermənistana verdiyi təbii qazın qiymətinin kəskin artması idi.

Ölkədə gərginlik elə bir həddə çatmışdı ki, hətta hakim partiyanın rəhbərlərindən olan Razmik Zurabyan Ermənistanın ən sadiq müttəfiqi sayılan Rusiya haqda gözlənilməz ifadələr işlətmişdi, AzadlıqRadiosunun erməni xidmətinə demişdi ki, aksiyaçılardan Ermənistanda sabitliyi pozmaq üçün istifadə edilir:
Yerevan yaxın aylarda Avropa Birliyi ilə tərəfdaşlıq sazişi imzalamalıdır və bu ərəfədə Rusiyanın bəzi addımları Ermənistanda etirazla qarşılanır.

Sovet İttifaqı dağılandan sonra Ermənistan həm iqtisadi, həm də təhlükəsizlik baxımından Rusiyaya güvənirdi.

Amma indi Ermənistan Avropa Birliyi ilə həm azad ticarət haqda saziş, həm də Şərq Tərəfdaşlıq proqramı çərçivəsində müqavilə imzalamaq niyyətindədir.

Bu, noyabrda Vilnüsdə baş verməlidir

Eyni sazişləri Moldova və Ukrayna da Avropa Birliyi ilə bağlamağa hazırlaşır.

Bu arada Kremlin hər üç dövlətə təzyiqləri nəzərə çarpır.

Rusiya bu dövlətlərin onun rəhbərliyi ilə fəaliyyət göstərən Gömrük ittifaqında təmsil olunmasını, başqa birliklərə üz tutmamasını istəyir.

Üzdə Ermənistanla Rusiya arasında əlaqələr problemsiz görünür. Bir neçə gün əvvəl iki dövlət Yerevanda kiçik azad ticarət zonası yaratdılar – Rusiyaya məxsus elektronika zavodunda.

Açılışda Ermənistanın baş naziri Tiqran Sarkisyan iki ölkə arasında iqtisadi əlaqələrin dinamik inkişaf etdiyini dedi.

Amma təbii qazın qiymətinin artırılması ilə yanaşı Rusiya Ermənistanda mənfi qarşılanan bir qərar da verdi - Azərbaycana 1 milyard dollarlıq silah satdı.

Bundan başqa, erməniləri Moskvada 18 nəfərin ölümünə səbəb olan yol qəzası törətmiş Ermənistan vətəndaşı Harutunyanın məhkəməsində baş verənlər qəzəbləndirdi.

O, məhkəməyə qadın xalatında çıxarılmışdı

Məhkəmə prosesindən reportaj verən Rusiyanın dövlət televiziyasında isə onun milli mənsubiyyətinə rişxənd edilmişdi.

Yerevanda məhkəməyə etiraz olaraq rus səfirliyi önündə aksiya da keçirilmişdi.

Aksiyaçılardan biri Avetik Işxanyan:
Amma bundan sonra həm Rusiya, həm də erməni rəsmiləri məhkəmə ilə bağlı məsələnin böyüməməsi üçün sakitləşdirici bəyanatlar verdilər.

Ermənistanda isə deyəsən, ictimai rəydə müəyyən dəyişiklik baş verir, artıq bəziləri öz ənənəvi müttəfiqlərinə şübhə ilə yanaşmağa başlayıblar.

Jurnalist Emma Gabrielyan deyir ki, indiyəcən Rusiya haqda “Ermənistanın müstəqilliyi və təhlükəsizliyinin qarantıdır” ifadələri işlənib. Bir il əvvələcən kimsə təsəvvür etməzdi ki, Yerevanda rus səfirliyi qarşısında aksiya keçirilə bilər.