ATƏT-dən sərt bəyanat: «Ukraynada demokratik inkişaf geri çevrilib»
Walburga Habsburg Douglas Kiyevdəki mətbuat konfransında, 29 oktyabr 2012
ATƏT-dən sərt bəyanat: «Ukraynada demokratik inkişaf geri çevrilib»
- Beynəlxalq müşahidəçilər Ukraynadakı parlament seçkilərini sərt tənqid ediblər
Bazar ertəsi Kiyevdə keçirilən mətbuat konfransında ATƏT-in müşahidə missiyasının rəhbəri Walburga Habsburg Douglas deyib ki, ciddi geriləmələr var - son illərdə əldə edilmiş bir sıra demokratik nailiyyətlərdən bu seçkilərdə imtina edilib:
“Hakimiyyət imkanlarından sui-istifadə və pulun bu seçkilərdəki rolunu nəzərə alanda, belə görünür ki, Ukraynadakı demokratik inkişaf geri çevrilib”.
Habsburg Douglas hakim komandadakı siyasətçilərin administrativ resurslardan seçkinin nəticələrinə təsir etmək üçün istifadə etdiyini deyib.
Müşahidə qrupunun rəhbəri onu da bildirib ki, media seçki kampaniyasını birtərəfli işıqlandırıb, seçki kampaniyalarının maliyyə mənbələri isə şəffaf olmayıb.
NATO və Avropa Şurası Parlament Assambleyasından olan müşahidəçilərin monitorinq qrupu isə bir qədər yumşaq bəyanat verib, onların rəyində daha az pozuntudan söhbət gedir.
Ukraynada səslərin təxminən yarısı sayılıb və prezident
Yanukovichin Regionlar Partiyası öndədir
Ukrayna Mərkəzi Seçki Komissiyasının verdiyi məlumata görə, Regionlar Partiyası sayılan səslərin 34 faizini toplayıb.
Həbsdəki müxalifət lideri Yulia Tymoshenkonun qızı Yevgeniya Dneprepetrovskda səs verir, 28 oktyabr 2012
Həbsdə olan müxalifət lideri Yulia Tymoshenkonun (Yulya Timoşenko) Batkivşina (Ata yurd) Partiyası 23 faiz səslə ikincidir.
Üçüncü yerdə gedən Kommunist Partiyası səslərin 15 faizini toplayıb.
Boks üzrə dünya şempionu Vitali Kliçkonun UDAR (Ukraynanın İslahatlar Uğrunda Demokratik İttifaqı) Partiyası 13, Azadlıq Partiyası isə 9 faiz səs toplayıb.
Səsvermənin ilkin nəticələri səsvermə günü keçirilən ekzit-polların nəticələri ilə üst-üstə düşür.
Ekzit-pollar da əsas mübarizənin Yanukoviç və Timoşenkonun partiyaları arasında getdiyini göstərirdi.
Iqtidar partiyası deyir ki, səslər sayılmaqda davam etdikcə onların qazandıqları mandatların da sayı artacaq.
Çünki Ukraynada parlamentdəki mandatların yalnız yarısı partiya siyahıları üzrə səsvermənin nəticələri əsasında qazanılır.
Qalan yarısı isə təkmandatlı dairələrdə seçkini udanlara çatır.
AzadlıqRadiosunu Rusiya hökuməti "arzuolunmaz təşkilat" elan edib
Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.
