Beynəlxalq təşkilatların siyasəti Azərbaycanı tam qane etmir

«Son zamanlar beynəlxalq təşkilatların Dağlıq Qarabağ problemi ilə bağlı yürütdüyü siyasət Azərbaycanı tam qane etmir».

Bunu jurnalistlərə Prezident Administrasiyasının İctimai-siyasi məsələlər şöbəsinin müdiri Əli Həsənov bildirib.

«Beynəlxalq hüquq normaları aydın şəkildə pozulduğu halda Ermənistana qarşı beynəlxalq təşkilatlar tərəfindən açıq-aşkar təzyiq müşahidə olunmur».

Ə.Həsənov deyir ki, beynəlxalq təşkilatlar sözdə Azərbaycanın ərazi bütövlüyünü dəstəkləyirlər, amma onlar ortaya iradə qoymurlar.

«Azərbaycanda 20 ildən artıqdır ki, 1 milyondan çox qaçqın və köçkün problemləri yaşanır və bu problemin həllində beynəlxalq təşkilatların səyləri yetərli deyil. İnsan hüquqları müxtəlif şəkildə pozulub və bu, aradan qaldırılmalıdır», - deyə Prezident Administrasiyasının rəsmisi bildirib.