Azərbaycan humanitar təşəbbüslə çıxış etdiyini bildirir
Azərbaycan tərəfi bildirir ki, bu gün, oktyabrın 29-da Ermənistana döyüş meydanında qalan bu ölkənin 30-a yaxın əsgərinin cəsədlərini təhvil verib.
Bu barədə xarici jurnalistlərə prezident köməkçisi Hikmət Hacıyev bildirib: "İlham Əliyevin təşəbbüsü əsasında Azərbaycan tərəfi həlak olmuş 30 hərbçinin cəsədini Ermənistana təhvil verib. Bundan əlavə, Ermənistana iki yaşlı erməni də təhvil verilib. Ermənistan bu məsələdə xoş məramını göstərmirdi. Bu mənada biz Rusiyanın Müdafiə Nazirliyinin və şəxsən Sergey Şoyqunun səylərini yüksək qiymətləndiririk".
Onun sözlərinə görə Rusiya tərəfindən bu humanitar təşəbbüsə dəstəyin nəticəsində Ermənistan Qazax-Tovuz istiqamətində humanitar dəhlizin açılmasına və həlak olmuş əsgərlərin cəsədlərini təhvil almağa razılıq verib: "Bu əməliyyat indicə başa çatıb".
Azərbaycan Ermənistana 30 əsgərin meyitini verib
Azərbaycan Dağlıq Qarabağ müharibəsində öldürülmüş 30 əsgərin meyitini Ermənistana təhvil verib və Yerevan da buna oxşar cavab verməyə hazırdır.
Bunu Ermənistanın Müdafiə Nazirliyi oktyabrın 29-da bildirib.
"Qızıl Aypara"nın könüllüsü həlak olub
Azərbaycan Qızıl Aypara Cəmiyyəti Bərdədə partlayış zamanı həlak olan Məhərrəm Mustafayevin bu qurumun könüllüsü olduğunu bildirir. Cəmiyyətin digər könüllüsü Fatma Bəbisova isə xəsarət alaraq xəstəxanaya yerləşdirilib.
Prezidentin köməkçisi Hikmət Hacıyev Twitter-də bu haqda yazıb: "Ata və yerli komanda üzvü, Beynəlxalq Qızıl Aypara Cəmiyyətinin könüllüsü Ermənistanın şəhəri kaset raketləri ilə atəşə tutması nəticəsində Azərbaycanın Bərdə şəhərində humanitar dəstək verərkən öldürülüb".
90 mülki şəxs həlak olub, 392 nəfər...
Azərbaycan Baş Prokurorluğu bu gün, oktyabrın29-da cəbhədə mülkü əhalinin itkiləri ilə bağlı növbəti açıqlama yayıb.
Mətbuat xidmətindən verilən məlumata görə, sentyabrın 27-dən (cəbhədə döyüşlər başlanandan) hazırkı vaxtadək Ermənistan ordusunun yaşayış məntəqələrini atəşə tutması nəticəsində Azərbaycan tərəfdən 90 mülki şəxs həlak olub, 392 nəfər yaralanıb: "Bundan başqa, 423 mülki obyekt, 92 çoxmənzilli yaşayış binası və 2406 yaşayış evi yararsız vəziyyətə düşüb".