Bakı görüş vaxtının dəyişdirilməsini təklif edib
Azərbaycan bu ölkənin xarici işlər naziri Ceyhun Bayramovun oktyabrın 29-na ATƏT-in Minsk qrupu həmsədrləri ilə nəzərdə tutulan görüşünün oktyabrın 30-na keçirilməsini təklif edib.
"Turan" agentliyinin xəbərinə görə, bu barədə Azərbaycan Xarici İşlər Nazirliyinin (XİN) mətbuat xidmətinin rəhbəri Leyla Abdullayeva bildirib.
"Biz indi həmsədrlər tərəfindən bunun təsdiqini gözləyirik", - deyə L.Abdullayeva qeyd edib.
Bu formatda Azərbaycan və Ermənistan xarici işlər nazirlərinin gözlənilən görüşünə gəlincə isə, mətbuat xidmətinin rəhbəri deyib ki, belə görüş heç əvvəldən nəzərdə tutulmurdu. "Cenevrədə ancaq ATƏT-in Minsk qrupunun həmsədrləri ilə görüş nəzərdə tutulurdu", - L.Abdullayeva söyləyib.
Bərdə və Goranboy rayonları atəşə tutulub
"Bərdə və Goranboy rayonlarının ərazisi Ermənistan silahlı qüvvələri tərəfindən atəşə tutulub".
Bu məlumatı Azərbaycan Müdafiə Nazirliyi oktyabrın 29-u, saat 12:25 radələrində yayıb.
Diplomatlar Bərdəyə gedib
Bu gün, oktyabrın 29-da Azərbaycandakı diplomatik korpusun nümayəndələri Bərdəyə səfər edib.
Onları Azərbaycan prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev və Baş prokuror Kamran Əliyev müşayiət edir.
Diplomatlar Bərdə rayonunda oktyabrın 27-i və 28-də raket atılan ərazilərə baş çəkməlidirlər. Bu raket zərbələrindən Bərdə rayonunda üst-üstə 25 mülki insanın həlak olduğu, 80 nəfərdən çoxunun isə yaralandığı bildirilir.
Azərbaycanın rəsmi qurumları bildirir ki, raketləri Ermənistan silahlı qüvvələrinin bölmələri atıb. Ermənistan tərəfi isə bunu təsdiqləmir.
Bərdə rayonu cəbhə xəttindən bir qədər kənarda yerləşir.
Baydendən daha bir Qarabağ çağırışı
ABŞ-da prezidentliyə Demokrat Partiyasından namizəd Co Bayden Dağlıq Qarabağ münaqişəsi ilə bağlı daha bir bəyanat yayıb. Bəyanatda deyilir ki, Dövlət katibi Mayk Pompeonun oktyabrın 25-də elan etdiyi atəşkəsdən sonra "Dağlıq Qarabağ xalqı üçün irimiqyaslı humanitar fəlakət başlanıb". Bayden prezident Donald Trampı Ermənistan, Azərbaycan və Türkiyə liderləri ilə birbaşa danışmaqla de-eskalasiyaya dərhal nail olmağa, Azərbaycan hərbçilərinin Dağlıq Qarabağa doğru irəliləməsini dayandırmağa çağırıb.
Bayden Tramp administrasiyasını Azərbaycana hərbi avadanlıq axınını dayandırmaq üçün Azadlığa Dəstək Aktına 907-ci əlavəni tam yerinə yetirməyə, Türkiyə və Rusiyanın silah təchizatı ilə münaqişəni qızışdırmasını dayandırması üçün onlara müraciət etməyə səsləyir.
"Birləşmiş Ştatlar döyüşləri dayandırmaq üçün avropalı tərəfdaşları ilə birlikdə diplomatik cəhdlərə liderlik etməli, əziyyətləri bitirməkdən ötrü beynəlxalq humanitar yardım təşəbbüsü irəli sürməlidir; mən administrasiyam dövründə məhz belə edəcəyəm", – Bayden vurğulayıb.