Avropa Birliyinin Xarici siyasət rəhbəri Jozep Borrel oktyabrın 18-də Azərbaycan və Ermənistanın xarici işlər nazirlərinə zəng vuraraq atışmanın davam etməsini pisləyib, onları atəşkəsə əməl etməyə çağırıb.

"Döyüş daha çox mülki şəxsin əziyyət çəkməsinə səbəb olur. Dövlətlər və cəmiyyətlər arasında münaqişəni dərinləşdirir, yaraların sağalmasını daha da çətinləşdirir", – Borrel telefon zənglərindən sonra yaydığı bəyanatda deyir.

13 kəndin işğaldan azad olunduğu bildirilir

Cəbrayıl rayonunun 13 kəndinin də işğaldan azad edildiyi bildirilir.

Bu barədə Azərbaycan prezidenti İlham Əliyev Twitter hesabında yazıb.

"Cəbrayıl rayonunun Soltanlı, Əmirvarlı, Maşanlı, Həsənli, Əlikeyxanlı, Qumlaq, Hacılı, Göyərçinveysəlli, Niyazqullar, Keçəl Məmmədli, Şahvəlli, Hacı İsmayıllı, İsaqlı kəndləri azad edilib....", - o vurğulayıb.

Prezident Cəbrayıl rayonunun mərkəzinin isə oktyabrın 4-də azad edildiyini bəyan etmişdi.

Əsir düşən yaralı Ermənistan hərbçilərinin müalicə olunduğu bildirilir

Azərbaycan Dövlət Təhlükəsizlik Xidməti (DTX) əsir düşən Ermənistan hərbçiləri ilə bağlı bu ölkənin Əsir və itkin düşmüş, girov götürülmüş vətəndaşlarla əlaqədar Dövlət Komissiyasının məlumatını yayıb.

Məlumatda qeyd edilib ki, Komissiyanın katibi İsmayıl Axundov yaralı vəziyyətdə əsir düşmüş Ermənistan hərbçiləri - 13.11.2001-ci il təvəllüdlü Sarqsyan Areq Siraki, 23.05.2001-ci il təvəllüdlü Amircanyan Narek Qariki və 07.09.2001-ci il təvəllüdlü Mikayelyan Albert Yervandiyə müalicə aldıqları hospitalda baş çəkib.

“Başçəkmə zamanı Komissiya katibi yaralı Ermənistan hərbçilərinin vəziyyəti, onlarla davranış, müalicələri və saxlanma şəraitləri ilə maraqlanmışdır.Ermənistan hərbçiləri Azərbaycanda onlara göstərilən münasibətdən və davranışdan razı qaldıqlarını, müalicələrinin normal aparıldığını bildirmiş, minnətdarlıq ifadə etmişlər.”,məlumatda vurğulanır.

Məlumata görə, beynəlxalq humanitar hüquq normalarının müvafiq müddəaları rəhbər tutularaq, başçəkmə zamanı yaralı Ermənistan hərbçilərindən ikisinin ailələri ilə telefon əlaqəsi saxlamaları təmin edilib: “Ailə üzvlərinin telefon nömrələrini xatırlamadığını bildirən Albert Mikaelyana isə videomüraciətlə yaxınlarına onunla davranış və müalicəsi barədə məlumat verilməsi üçün şərait yaradılmışdır.”

Amma, bu açıqlamaya əsir düşdükləri bildirilən hərbiçilərin özləri, ailələri və ya Ermənistanın rəsmi qurumlarından, hələlik, hər hansı münasibət bəlli deyil.

“Xudafərin körpüsünün üzərində Azərbaycan bayrağı…”

Azərbaycan Silahlı Qüvvələrinin Xudafərin körpüsünün üzərində Azərbaycan bayrağını qaldırdıqları bildirilir.

Bu barədə Azərbaycan prezident İlham Əliyev "Twitter" səhifəsində paylaşım edib.

“Azərbaycan Silahlı Qüvvələri qədim Xudafərin körpüsünün üzərində Azərbaycan bayrağını qaldırdılar…”, deyə o yazıb

Xudafərin körpüsü Azərbaycan və İranı birləşdirən, Cəbrayıl rayonunda yerləşən Araz çayı üzərində salınmış iki körpüdür.

Azərbaycan Silahlı Qüvvələrinin Xudafərin körpüsünün yerləşdiyi Cəbrayıl rayonunun mərkəzini isə oktyabrın 4-də işğaldan azad etdiyi açıqlanıb.