“Azərbaycan erməni hərbçilərin meyitlərinin bir hissəsini verməyə hazırdır”
“Azərbaycan birtərəfli qaydada erməni hərbçilərinin meyitlərinin bir hissəsini verməyə hazırdır”
Bu oktyabrın 18-də Azərbaycan Əsir və itkin düşmüş, girov götürülmüş vətəndaşlarla əlaqədar Dövlət Komissiyasının məlumatında bildirilib.
Məlumatda qeyd edilib ki, həmin məsələ Komisiyanın Beynəlxalq Qızıl Xaç Komitəsinin (BQXK) Azərbaycandakı Nümayəndəliyi ilə keçirilmiş görüşlərdə onların diqqətinə çatdırılıb:
“ ...Elan edilmiş müvəqqəti humanitar atəskəsin ruhuna uyğun olaraq, Azərbaycanın birtərəfli qaydada hazırda Azərbaycan tərəfində olan erməni hərbçilərinin meyitlərinin bir hissəsini iki ölkənin dövlət sərhədinin Tovuz rayonu istiqamətində əvvəlcədən razılaşdırılmış dəhlizdə BQXK-nın vasitəçiliyi ilə Ermənistana verməyə hazır olduğunu diqqətə çatdırmışdır.”
Məlumata görə, bu barədə qarşı tərəfə bildirilməsi xahiş olunub. Məlumatı Dövlət Təhlükəsizlik Xidməti yayıb.
Ermənistana məxsus PUA-nın vurulduğu bildirilir
Ermənistan silahlı qüvvələrinə məxsus taktiki pilotsuz uçuş aparatının (PUA) vurudluğu bildirilir.
Bu barədə Azərbaycan Müdafiə Nazirliyi (AMN) məlumat yayıb.
Məlumatda qeyd edilir ki, oktyabrın 18-i saat 13:00-da Horadiz istiqamətində uçuşlar keçirməyə cəhd göstərən Ermənistan silahlı qüvvələrinə məxsus taktiki pilotsuz uçuş aparatını (PUA) Azərbaycan Hava Hücumundan Müdafiə bölmələri aşkar edərək vurublar.
“Ağdam rayonu atəşə tutulur”
“Ağdam rayonu ərazisi Ermənistan silahlı qüvvələri tərəfindən atəşə tutulur.”
Bu məlumatı da Azərbaycan Müdafiə Nazirliyi (AMN) oktyabrın 18-i, saat 13:42-də yayıb.
AMN: “Ermənistanın Su-25 təyyarəsi vurulub”
Ermənistan silahlı qüvvələrinin növbəti Su-25 hücum təyyarəsinin vurulduğu bildirilir.
Bu barədə Azərbaycan Müdafiə Nazirliyi ( AMN) oktyabrın 18-də məlumat yayıb.
Məlumatda yazılıb ki, oktyabrın 18-də saat 12.30-da cəbhənin Cəbrayıl istiqamətində Azərbaycan Ordusunun mövqelərinə aviazərbələr endirməyə cəhd göstərən Ermənistan silahlı qüvvələrinin növbəti Su-25 hücum təyyarəsini Hava Hücumundan Müdafiə bölmələri vurub.
Azərbaycan bundan əvvəl, oktyabrın 17-də saat 11:11 radələrində də Cəbrayıl istiqamətində Ermənistan silahlı qüvvələrinə məxsus 1 ədəd Su-25 təyyarəsinin vuruldğunu açıqlamışdı.