Etnik erməni və Azərbaycan qüvvələrinin ötən həftəsonu Rusiyanın vasitəçiliyi ilə əldə etdiyi atəşkəs razılaşmasına əməl etməsi çox vacibdir. Bunu Kremlin sözçüsü Dmitri Peskov bu gün – oktyabrın 12-də deyib.
"Reuters" Peskova istinadla yazır ki, Kreml baş verənləri diqqətlə izləyir.
Lavrov atəşkəsdən danışdı
"Gördüyümüz kimi, bu razılaşmaya tam əməl olunmur, əməliyyatlar davam edir", – Rusiyanın Xarici İşlər naziri Sergey Lavrov ermənistanlı həmkarı Zöhrab Mnatsakyanla danışıqlardan öncə deyib.
"Ümidvarıq, sizinlə və azərbaycanlı həmkarlarınız, eləcə də müdafiə nazirliklərindən olanlarla təmaslarımız üçtərəfli formatda əldə olunmuş razılaşmaların tam icrasına kömək edəcək", – Lavrov vurğulayıb.
Xarici diplomatlar Gəncədə
Oktyabrın 12-də Azərbaycandakı diplomatik korpusun rəhbərləri, səfirlər, hərbi attaşelər, beynəlxalq təşkilatların nümayəndəliklərinin rəhbərləri Gəncəyə səfər ediblər.
AZƏRTAC-ın xəbərinə görə, diplomatları Azərbaycan prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev müşayiət edir.
Səfərin məqsədinin diplomatları raket zərbələri endirildikdən sonra Gəncədəki mövcud vəziyyətlə tanış etmək olduğu açıqlanıb.
Azərbaycan rəsmi qurumları bildirir ki, oktyabrın 11-i saat 2 radələrində Ermənistan silahlı qüvvələri cəbhə xəttindən kənarda yerləşən Gəncə şəhərinə raket zərbələri endirib. Nəticədə 9 dinc sakinin öldüyü, 39-nun isə yaralandığı deyilir.