Tərtər atəşə tutulur, ölən var
"Oktyabrın 1-i səhər saatlarından etibarən Ermənistan silahlı qüvvələrinin bölmələri Tərtər şəhərini yenidən artilleriya atəşinə tutur".
Bu barədə Azərbaycan Müdafiə Nazirliyi (AMN) oktyabrın 1-də səhər saat 9:51-də məlumat yayıb.
Azərbaycan Baş Prokurorluğundan isə bildiriblər ki, oktyabrın 1-də saat 09 radələrində işğalçı ölkənin silahlı qüvvələrinin atdığı və Tərtər şəhər avtovağzalına düşən top mərmisinin qəlpələrindən 1982-cı il təvəllüdlü Zabil Həsənov həlak olub, avtovağzala ciddi ziyan dəyib.
Baş Prokurorluq bildirir ki, son günlər cəbhə bölgəsində Ermənistan silahlı qüvvələrinin zərbələrindən 16 mülki şəxs ölüb, 55 dinc sakin də müxtəlif xəsarətlər alıb.
Rusiya və Fransa Dağlıq Qarabağda atəşkəsə çağırır
Rusiya prezidenti Vladimir Putin və onun fransalı həmkarı Emmanuel Makron Azərbaycan və Ermənistan silahlı qüvvələri arasında atəşkəsə çağırıb.
Kremlin oktyabrın 1-də bildirməsinə görə, iki prezident telefon söhbətində Dağlıq Qarabağda son döyüşləri səngitməyin diplomatik yollarını müzakirə ediblər.
"Vladimir Putin və Emmanuel Makron qarşı tərəfləri dərhal tam atəşkəsi icra etməyə, gərginliyi azaltmağa, maksimum təmkin göstərməyə çağırıb", – Kreml bildirir.
İki lider ATƏT-in Minsk qrupu adından döyüşlərin dayandırılması və danışıqların bərpasına dəstək ifadə edən bəyanat verməyə hazır olduqlarını deyiblər. Rusiya, Fransa və ABŞ Minsk qrupunun həmsədr ölkələridir.
Döyüşlərin 5-ci günü
Azərbaycan və Ermənistan silahlı qüvvələrinin təmas xəttində sentyabrın 27-dən başlayan ağır döyüşlərin hələ də davam etdiyi bildirilir.
Azərbaycan Müdafiə Nazirliyi (AMN) oktyabrın 1-də səhər saat 8:45-də yaydığı məlumatda qeyd edib ki, Ermənistan silahlı qüvvələrinin işğal altında olan torpaqlarda tutduqları mövqelərinə gecə ərzində bölmələri artilleriya zərbələri endirib.
Lavrov Azərbaycan və Ermənistan xarici işlər nazirləri ilə danışıb
Rusiya xarici işlər naziri sentyabrın 30-da Azərbaycan və Ermənistan nazirləri ilə ayrıca olaraq telefon söhbətləri aparıb.
Rusiya Xarici İşlər Nazirliyinin bəyanatında deyilir: "Rusiya tərəfindən davam edən genişmiqyaslı hərbi əməliyyatlardan ciddi narahatlıq ifadə olunub. Atəşin dərhal dayandırılmasına və gərginliyin deeskalasiyasına, habelə təxribatçı və davakar ritorikadan çəkinilməsinə çağırış səsləndirilib. Tərəflərin yubadılmadan danışıqlar masasına qayıtmasının zəruriliyi vurğulanıb".
Rusiya XİN habelə bildirir ki, Moskva müvafiq kontaktların yaradılması üçün meydança verməyə hazırdır...