2026, 21 Noyabr, şənbə, Bakı vaxtı 00:43

Xəbərlər

Azərbaycanda milli dirçəlişin 38-ci ili

Bakıda Lenin meydanında mitinq. 1989
Bakıda Lenin meydanında mitinq. 1989

Noyabrın 17-si Azərbaycanda Milli Dirçəliş Günüdür.

38 il öncə – 1988-ci il noyabrın 17-də Bakının Lenin, indiki Azadlıq meydanında Azərbaycana qarşı ərazi iddialarına və SSRİ rəhbərliyinin bu məsələdəki mövqeyinə etiraz olaraq mitinqlər başlayıb. Nümayişçilər mərkəzi hakimiyyəti bu iddiaların qarşısını almamaqda günahlandırırdılar.

O dövrün şahidlərinin sözlərinə görə, Sovet rəhbərliyinin məsələyə şübhəli şəkildə biganə yanaşması insanları daha da hiddətləndirib və qısa vaxt ərzində yüz minlərlə vətəndaş hərəkata qoşulub.

Fasiləsiz mitinqlər dekabrın 5-dək davam edib və həmin gün sovet ordusunun müdaxiləsi ilə zorakılıqla dağıdılıb.

1992-ci ildə noyabrın 17-si bayramlar sırasına daxil edilib və qeyri-iş günü elan olunub.

Bundan bir il əvvəl – 1991-ci ildə isə Azərbaycanda Dövlət Müstəqilliyi haqqında Konstitusiya Aktı qəbul edilmişdi.

Milli Dirçəliş Günü bu gün də dövlət səviyyəsində keçirilsə də, 2006-cı ilin dekabrında qanunvericiliyə edilən dəyişikliklərdən sonra artıq qeyri-iş günü deyil.

'Bilmədim özümü otaqdan bayıra necə atdım' - 17 noyabr xatirələrdə

No media source currently available

Yaxınları həbsdəki jurnalistin səhhətindən narahatdır

Şəmşad Ağa
Şəmşad Ağa

arqument.az saytının baş redaktoru, "MeydanTV işi" üzrə həbsdə olan Şəmşad Ağanın səhhətinin ağırlaşdığı bildirilir.

Bu barədə MeydanTV-yə jurnalistin yaxınları məlumat veriblər.

Onların sözlərinə görə, Ş.Ağanın öd kisəsində 9-10 millimetr ölçüsündə daş aşkarlanıb və o, tez-tez kəskin ağrı tutmalarından əziyyət çəkir.

Yaxınları deyir ki, həkim müayinəsindən keçən Ş.Ağanın öd kisəsindəki daşın cərrahi yolla çıxarılması zəruri sayılır. Onlar Penitensiar Xidmətin müalicə müəssisəsində bu əməliyyatın yalnız ailənin vəsaiti hesabına aparıla biləcəyinin deyildiyini vurğulayırlar.

Ailəsi Ş.Ağanın sağlamlıq vəziyyətindən ciddi narahatdır və əməliyyatın gecikdirilməməsini istəyir.

Hələlik bu açıqlamalara cavabdeh rəsmi qurumlardan münasibət almaq mümkün olmayıb.

Ş.Ağa səhhətində yaranan problemlərlə əlaqədar oktyabrın 13-də Penitensiar Xidmətin 3 saylı İxtisaslaşdırılmış Müalicə Müəssisəsinə köçürülüb.

Son vaxtlar həbsdə olan bir çox jurnalist və fəalın yaxınları onların səhhəti ilə bağlı həyəcanlı açıqlamalar yayırlar. Onlar doğmalarının həbs yerlərində lazımi və yetərli müayinə-müalicədən məhrum qaldıqlarını iddia edirlər. Rəsmilər isə bu cür şikayətləri bir o qədər də əsaslı saymır.

MeydanTV-nin həbsdə olan baş redaktoru Aynur Elgünəş də dörd gün əvvəl böyrəyindən əməliyyat olunub.

Xatırlatma

MeydanTV-nin baş redaktoru Aynur Elgünəş, əməkdaşları Aysel Umudova, Natiq Cavadlı, Aytac Əhmədova, Xəyalə Ağayeva və Ramin Cəbrayılzadə 2024-cü il dekabrın 6-dan həbsdədir. Həmin gün onlarla yanaşı, Bakı Jurnalistika Məktəbinin direktor müavini Ülvi Tahirov da saxlanılıb.

Bu cinayət işi üzrə 2025-ci ilin fevralında daha üç jurnalist – Şəmşad Ağa, Nurlan Qəhrəmanlı və Fatimə Mövlamlı həbs edilib.

Mayda jurnalist Ülviyyə Quliyeva, avqustda isə fotojurnalist Əhməd Muxtarov da MeydanTV ilə bağlı cinayət işi üzrə istintaqa cəlb olunaraq həbsə alınıb.

Onlara qaçaqmalçılıq, qanunsuz sahibkarlıq, cinayət yolu ilə əldə edilmiş əmlakın leqallaşdırılması, vergidən yayınma və digər ittihamlar irəli sürülüb.

2023-cü ilin noyabrından başlayaraq Azərbaycanda qruplar halında 30-dan çox jurnalist və ictimai fəal qaçaqmalçılıq ittihamı ilə həbs edilib. Onların arasında "AbzasMedia" və ToplumTV-nin də çoxsaylı əməkdaşı var.

"AbzasMedia işi" üzrə təqsirləndirilən yeddi jurnalistə 7 il 6 aydan 9 ilədək həbs cəzası verilib. AzadlıqRadiosunun jurnalisti Fərid Mehralızadə də onların arasındadır və o, 9 il müddətinə azadlıqdan məhrum edilib.

"ToplumTV işi" üzrə məhkəmə prosesi iyulun sonunda yekunlaşıb və doqquz nəfərə ümumilikdə 121 il (12 ildən 15 ilədək) həbs cəzası kəsilib.

Jurnalistlər bu ittihamların heç birini qəbul etmirlər.

Aİ Rusiyaya sanksiyaları genişləndirib

Tatyana Kim
Tatyana Kim

Avropa İttifaqı (Aİ) ölkələrinin xarici işlər nazirləri Rusiyaya qarşı sanksiya siyahılarına 145 fiziki və hüquqi şəxsin əlavə edilməsi barədə razılığa gəliblər. Buraya "kölgə donanması" adlandırılan donanmaya məxsus gəmilər də daxildir. Bu barədə Fransanın xarici işlər naziri Jan-Noel Barro məlumat verib.

Barronun sözlərinə görə, sanksiyalar xüsusilə "Wildberries" şirkətinin rəhbəri Tatyana Kimə şamil olunacaq. Sankt-Peterburqdakı neft terminalı da məhdudiyyətlərə məruz qalacaq.

Tam siyahı hələ dərc olunmayıb. Bu, sanksiyaların yeni, 22-ci paketi deyil; siyahılara yeni adlar mütəmadi aparılan yeniləmə çərçivəsində daxil edilib.

Azadlıq Radiosunun müxbiri yazır ki, 22-ci sanksiya paketinin müzakirəsinə bu həftə başlanacaq və onun Milad bayramınadək qəbul edilməsi planlaşdırılır.

Bundan əvvəl "Sistema" araşdırma layihəsi müəyyən edib ki, Aİ ölkələrinin daimi nümayəndələrinin noyabrın 11-də razılaşdırdığı siyahıda ilkin müzakirələrdə nəzərdə tutulan dörd hüquqi şəxs yer almayıb. Müzakirələr zamanı Birinci İnvestisiya Bankı, İnvestisiya Kooperativ Bankı, "RESO Kredit" bankı və "TANEKO" neft şirkəti siyahıdan çıxarılıb.

Bu qurumların hamısı avropalı səhmdarların maraq dairəsinə daxildir.

Estoniya dekabrın 1-dən Rusiya ilə sərhədi bağlayır

Estoniya-Rusiya sərhədi
Estoniya-Rusiya sərhədi

Estoniya dekabrın 1-dən Rusiya ilə bütün sərhəd-keçid məntəqələrini bağlayacaq. Bu barədə Estoniyanın xarici işlər naziri Marqus Tsahkna "X" sosial şəbəkəsində yazıb.

Nazir bildirib ki, sərhədin bağlanması təxribat cəhdinə cavab tədbiri olacaq. Tallin bu cəhdin arxasında Rusiyanın Baş Kəşfiyyat İdarəsinin (QRU) dayandığını hesab edir.

"Rusiya anlamalıdır ki, Estoniyaya qarşı düşmənçilik hərəkətləri cavabsız qalmayacaq. Sərhəd keçidlərinin bağlanması Rusiyanın Estoniyada düşmənçilik fəaliyyəti aparmaq imkanlarını məhdudlaşdıracaq, sanksiyalardan yayınma hallarının qarşısını almaq imkanlarımızı isə gücləndirəcək", – Tsahkna vurğulayıb.

O, Finlandiya, Latviya və Litvadakı tərəfdaşların da bu qərar barədə məlumatlandırıldığını əlavə edib.

Noyabrın 15-də Estoniyada dron istehsal edən "Threod Systems" müəssisəsini yandırmağa cəhddə şübhəli bilinən səkkiz Latviya vətəndaşı saxlanılıb. Müəssisənin təhlükəsizlik xidməti yanğının qarşısını vaxtında ala bilib.

Estoniyanın Daxili Təhlükəsizlik Xidmətinin baş direktoru Marqo Palloson bildirib ki, əks-kəşfiyyat orqanları yanğın törətmək cəhdində Rusiyanın əli olduğunu təsdiqləyib. Onun sözlərinə görə, bu əməliyyat Rusiyanın Baş Kəşfiyyat İdarəsi (QRU) tərəfindən əlaqələndirilib.

Bu, il ərzində Estoniyanın müdafiə sənayesi müəssisələrinə qarşı ikinci yanğın cəhdidir.

Avqustun 15-nə keçən gecə Tallindəki "Milrem Robotics" zavodunda da yanğın baş verib. Pilotsuz yerüstü döyüş maşınları istehsal edən bu şirkət Ukrayna ilə sıx işləyir.

Həmin yanğını törətməkdə şübhəli bilinən iki nəfər saxlanılıb. Estoniya bu hadisəyə görə də Rusiyanı ittiham edib.

Çexiyada son 33 ilin ən böyük etiraz aksiyası keçirilib

Praqada etiraz aksiyası
Praqada etiraz aksiyası

Noyabrın 15-də Çexiyanın paytaxtı Praqada son 33 ilin ən böyük etiraz aksiyası keçirilib. Yüzminlərlə insan hökumətin kütləvi informasiya vasitələrinin maliyyələşdirilməsi ilə bağlı irəli sürdüyü islahata qarşı nümayişə çıxıblar. Təşkilatçılar aksiyaya 350-400 min nəfərin qatıldığını bildiriblər. İştirakçıların çoxu Praqaya ölkənin digər şəhərlərindən gəlib.

Oktyabrın 24-də medianın maliyyələşdirilməsi haqqında qanun layihəsi Çexiya parlamentində birinci oxunuşdan keçib. Layihədə Çexiyanın əsas ictimai media qurumları – Çexiya Televiziyası və Çexiya Radiosunun ictimai maliyyələşdirmədən dövlət maliyyələşdirməsinə keçirilməsi nəzərdə tutulur.

Hazırda ölkədə hər ev təsərrüfatı milli televiziya və radio yayımı üçün aylıq 205 kron (təxminən 9,5 dollar) məcburi ödəniş edir. Qanunvericilər bunu dövlət büdcəsindən maliyyələşdirmə ilə əvəzləməyi təklif edirlər.

İctimaiyyət isə dəyişikliyə etiraz edir. Etirazçıların mövqeyinə görə, yeni sistem nəticəsində media müstəqilliyini itirə, maliyyələşdirmə dövlətin jurnalistlərə təzyiq vasitəsinə çevrilə bilər. Digər yandan, təklif olunan dövlət vəsaiti medianın hazırda ictimai ödənişlərdən əldə etdiyindən 15 faiz azdır.

Praqanın mərkəzindəki Letna parkı etirazçılarla dolub. Onlar “Əlinizi mediadan çəkin!” və “Qoy mətbuat özü siyasətçilərlə məşğul olsun!” yazılmış plakatlar qaldırıblar.

Bazar günü Praqada polis patrulları və təcili tibbi yardım briqadalarının sayı artırılıb, ictimai nəqliyyatın əlavə reysləri təşkil edilib. Polis nümayişin dinc keçdiyini bildirib.

Bu, Çexiyanın müstəqil dövlət olduğu 1993-cü ildən bəri Praqada keçirilən ən böyük nümayişdir.

Bundan əvvəl isə noyabrın 3-də Çexiya Radiosu və Televiziyasının əməkdaşları tətil keçiriblər. Tətil televiziya və radio yayımında fasilələrə səbəb olub.

Ağstafada sursat partlayıb, bir nəfər ölüb,biri də yaralanıb

Partlayış
Partlayış

Noyabrın 15-də Ağstafa rayonunun Çeyrançöl ərazisində sursat partlayışı olub.

Bu barədə Daxili İşlər Nazirliyi, Baş Prokurorluq və Minatəmizləmə Agentliyinin (ANAMA) Mətbuat xidmətləri məlumat yayıblar.

Məlumatda iddia edilir ki, Qazax rayonunun iki sakininin ( adları açıqlanan şəxslərin Dəmirçilər və Daşsalahlı kəndlərinin sakinləri olduğu qeyd edilir) partlamamış hərbi sursata müdaxiləsi nəticəsində partlayış baş verib.

Hadisə nəticəsində onlardan birinin həlak olduğu, digərinin isə xəsarət aldığı vurğulanır.

Faktla bağlı Ağstafa rayon prokurorluğunda araşdırma aparılır.

Hələlik, rəsmi açıqlamaya həlak olan və xəsrət alan şəxslərin yaxınlarından münasibət almaq mümkün olmayıb.

Xatırlatma

Azərbaycanda buna qədər bir neçə oxşar hadisə baş verib. Onlardan

sonuncusu bu il sentyabrın 1-dən 2-nə keçən gecə Goranboy rayonunda baş vermişdi.Rəsmi açıqlamada vurğulanırdı ki, rayonda sursat anbarında yanğınla müşayiət olunan partlayış baş verib.Fövqəladə Hallar, Müdafiə və Daxili İşlər nazirlikləri birgə məlumatda qeyd edirdilər ki, hadisə ilə əlaqədar təhlükəsizlik tədbirləri çərçivəsində yaxınlıqdakı insanlar təxliyə edilib.

"Xəsarət alan olmayıb", - rəsmi məlumatda əlavə edilirdi.
Amma onda hadisənin dəqiq baş vermə səbəbi açıqlanmamışdı.
Lakin 3 il əvvəl Müdafiə Sənayesi Nazirliyinin "Şirvan Araz zavodu" Məhdud Məsuliyyətli cəmiyyətində (MMC) baş verən partlayışda ölüm də olmuşdu.Onda da istintaqın detallı təfərruatları geniş ictimaiyyətə açıqlanmadı.

2018-ci ildə isə paytaxt Bakıda Müdafiə Sənayesi Nazirliyinin “Radioquraşdırma” zavodunda yanğınla müşahidə edilən partlayış qeydə alınmışdı.Həmin vaxt isə xoşbəxtlikdən ölən, xəsarət alan olmamışdı.

Əhalinin dərman və ərzaq xərcləri artır

Hər 100 manatın 51-i yeməyə gedir: 'Kasıblıq əlamətidir'

No media source currently available

Azərbaycan vətəndaşlarının ticarət şəbəkələrindəki həm tibbi, həm də ərzaq xərcləri artmaqda davam edir.

Dövlət Statistika Komitəsi (DSK) bildirir ki, 2026-cı ilin yanvar-oktyabr aylarında pərakəndə ticarət şəbəkəsində istehlakçılara ən azı 57 milyard 523 milyon manatlıq məhsul satılıb.

Bu məbləğin ən azı 31 milyard 58 milyon manatı ərzaq məhsulları, içkilər və tütün məmulatlarına, 26 milyard 464 milyon manatdan çoxu isə qeyri-ərzaq mallarına sərf olunub: "2025-ci ilin yanvar-oktyabr ayları ilə müqayisədə pərakəndə ticarət dövriyyəsi real ifadədə 3.8 faiz, o cümlədən ərzaq məhsulları, içkilər və tütün məmulatları üzrə 1.5 faiz, qeyri-ərzaq malları üzrə isə 6.6 faiz artıb".

Ötən illə müqayisədə xərclərdə ən çox artım 21.2 faizlə əczaçılıq məhsulları və tibbi ləvazimatlar sahəsində qeydə alınıb. Azərbaycanda dərmanların qiyməti dövlət tərəfindən tənzimlənir. Lakin ekspertlərin fikrincə, ölkədə bir çox dərmanlar qonşu ölkələrlə müqayisədə daha bahadır. Üstəlik, dərmanların bahalaşması prosesi də davam edir. Müstəqil iqtisadçılar isə deyirlər ki, vətəndaşların xərclərinin yarısından çoxu yalnız ərzağa gedirsə, bu, onların böyük bir qisminin maddi vəziyyətinin ağırlığından xəbər verir.

Rəsmi açıqlamaya görə isə, Azərbaycanda son illər yoxsulluq səviyyəsi 5 faiz civarında dəyişir.

AXCP rayon şöbəsinin sədri 30 sutka həbs edilib

Elnur Yusubov
Elnur Yusubov

Azərbaycan Xalq Cəbhəsi Partiyası (AXCP) Sabunçu rayon şöbəsinin sədri Elnur Yusubov 30 sutka müddətinə inzibati qaydada həbs olunub.

Bu barədə partiya onun ailəsinə istinadən məlumat yayıb.
Partiyanın bildirdiyinə görə, Elnur Yusubov noyabrın 13-də İnzibati Həbs Olunanların Saxlanılma Mərkəzindən ailəsinə zəng edərək həbs olunduğunu bildirib.

Onun sosial şəbəkə paylaşımlarına görə İnzibati Xətalar Məcəlləsinin 388-1.1.1-ci maddəsi ilə təqsirli bilindiyi vurğulanır.

Həmin maddə internetdə yayılması qanunla qadağan edilmiş məlumatların yerləşdirilməsinə görə məsuliyyət nəzərdə tutur. Bu əmələ görə fiziki şəxslər 500 manatdan 1000 manatadək cərimə oluna və ya qanunda nəzərdə tutulan hallarda bir ayadək inzibati həbs edilə bilərlər.

Amma Yusubovun konkret hansı paylaşımına görə cəzalandırıldığı açıqlanmayıb.
Rəsmi qurumlardan da bu məlumata münasibət öyrənmək mümkün olmayıb.

12 noyabr

Xalq Cəbhəsinin rayon şöbəsinin sədri yoxa çıxıb, avtomobili isə yerindədir

Azərbaycan Xalq Cəbhəsi Partiyası (AXCP) Sabunçu rayon şöbəsinin sədri Elnur Yusubovun yerinin məlum olmadığını açıqlayıb.

Partiyadan verilən məlumata görə, o, noyabrın 12-də səhər tezdən işə getmək üçün evdən çıxıb və hazırda ona zəng çatmır.

"Ailəsindən verilən məlumata görə, o, hər gün işə şəxsi avtomobili ilə gedir. Bu gün isə işə gedib çatmayıb, avtomobili də yerində qalıb. Maraqlı məqam odur ki, maşının qapısı açıq, açarı da içində olub. Ehtimala görə, uşaqlarını məktəbə aparıb-gətirən ailə üzvlərinin istifadə edə bilməsi üçün maşını açıq saxlayıb", – AXCP-dən bildirilib.

Partiya onun saxlanıldığını güman edir.

Hələlik bu məsələ ilə bağlı Daxili İşlər Nazirliyi və digər rəsmi qurumlardan münasibət almaq mümkün olmayıb.

Xatırlatma

Son illər AXCP-nin bir çox üzvü vaxtaşırı inzibati qaydada həbs edilir. Hazırda partiyanın 20-dən çox fəalı uzunmüddətli həbsdədir. Onların arasında AXCP sədri Əli Kərimli də var. Həmin şəxslər müxtəlif ittihamlarla üzləşsələr də, partiya onların siyasi sifarişlə həbs olunduğunu bildirir.

Hüquq müdafiəçilərinin hazırladığı son siyahıya əsasən, Azərbaycan həbsxanalarında ümumilikdə 322 siyasi məhbus var. Amma rəsmilər, bir qayda olaraq, ölkədə siyasi fəaliyyətə görə həbslərin olması ilə bağlı iddiaları əsassız sayırlar. Onlar vurğulayırlar ki, həmin şəxslər sırf törətdikləri əməllərə görə mühakimə ediliblər.

Aİ liderləri ilk süni intellekt sammitini keçirəcəklər

Süni intellekt
Süni intellekt

Noyabrın 13-də Avropa İttifaqı (Aİ) liderləri Dublində süni intellektə (Sİ) həsr olunmuş ilk sammitə toplaşacaqlar. Görüşdə bu sahədə ABŞ və Çinlə rəqabət aparmağın yolları, maliyyələşmə və digər aktual məsələlər müzakirə olunacaq.

Son aylar süni intellekt agentlərinin nəzarətdən çıxması ilə bağlı bir neçə narahatedici hadisə qeydə alınıb. "Nvidia" şirkətinin rəhbəri Censen Huanqın bu həftə istefa verməsi isə sektoru yenidən sarsıdıb və Sİ sənayesi ən böyük dəstəkçilərindən birini itirib.

Dublin sammitində Aİ liderləri bürokratik əngəllərin aradan qaldırılması yollarını və süni intellektdən istifadə qaydalarını da dəyərləndirəcəklər.

"Mistral AI" şirkətinin baş icraçı direktoru Artur Menş və Nobel mükafatı laureatı, süni intellekt sahəsinin öncüllərindən sayılan Cefri Hinton toplantıda çıxış edərək liderləri məlumatlandıracaqlar.

Sammitdə Ukrayna məsələsi də diqqət mərkəzində olacaq. Bu mövzu tədbirin gündəliyinə sonradan ikinci əsas məsələ kimi daxil edilib. Belə ki, bir gün əvvəl ABŞ nümayəndələri Stiv Uitkoff və Cared Kuşner Moskvada Rusiya prezidenti Vladimir Putinlə danışıqlar aparıb, ardınca Ukrayna prezidenti Volodimir Zelenski ilə görüşmək üçün Dublinə gediblər.

Aİ-nin yüksəkvəzifəli rəsmisinin sözlərinə görə, liderlər Avropanın sülh danışıqlarındakı rolunu və atəşkəs əldə olunacağı halda Ukraynaya verilə biləcək mümkün təhlükəsizlik zəmanətlərini nəzərdən keçirəcəklər.

'Microsoft'un xidmətlərindəki nasazlıq saatlarla davam edib

"Microsoft"
"Microsoft"

Noyabrın 12-də "Microsoft"un "Outlook" və "Teams" xidmətlərinin işində təxminən 10 saatlıq fasilə yaranıb. Nasazlıq dünya üzrə bu populyar platformalardan istifadə edən şirkətlərin və dövlət qurumlarının fəaliyyətinə təsir göstərib.

"Microsoft" son açıqlamasında xidmətlərin işini yaxşılaşdırmaq səylərinin gözlənildiyi kimi getmədiyini bildirib.

Şirkətdən verilən məlumata görə, "Microsoft 365"in "Exchange Online" və elektron poçtdan asılı digər funksiyaları nasazlıqla üzləşib. "Exchange Online"dan asılı olmayan funksiyalar isə adi qaydada işləməyə davam edib. "Exchange Online" şirkətin elektron poçt, təqvim, kontaktlar və tapşırıqların idarə olunmasını təmin edən bulud əsaslı mesajlaşma platformasıdır.

Avstraliyanın daxili işlər və kibertəhlükəsizlik naziri Toni Börk bildirib ki, "Microsoft" baş verənlərin kiberhücumla əlaqəli olmadığını düşünür. O, problemə uğursuz sistem yeniləməsinin səbəb ola biləcəyini vurğulayıb.

Yaranan problemlər Avstraliyanın kəşfiyyat xidməti və federal polisinə də təsirsiz ötüşməyib.

ABŞ Konqresinin Nümayəndələr Palatası isə nasazlığın onların istifadəçilərini də əhatə etdiyini və mühəndislərin problemi aradan qaldırmaq üçün "Microsoft"la birlikdə çalışdığını açıqlayıb.

'Nvidia'nın rəhbəri Censen Huanq istefa verib

Censen Huanq
Censen Huanq

Süni intellekt texnologiyaları sahəsindəki ən nəhəng korporasiyalardan olan "Nvidia"nın rəhbəri Censen Huanq vəzifəsindən gedib. Bu barədə noyabrın 12-də şirkətin mətbuat xidməti məlumat yayıb.

Huanq prezident, baş icraçı direktor və Direktorlar Şurasının üzvü postlarından ayrılıb. Baş icraçı direktorun səlahiyyətlərini müvəqqəti olaraq şirkətin icraçı vitse-prezidenti və maliyyə direktoru Kolett Kress icra edəcək.

Şirkətin açıqlamasında Huanqın istefasının səbəbləri göstərilməyib. Ancaq son günlər onun bir qadınla intim münasibətinin olduğu üzə çıxıb. ABŞ hakimiyyəti həmin qadının Çin xüsusi xidmət orqanlarına işlədiyindən şübhələnir. Huanq həyat yoldaşına xəyanət etdiyini boynuna alıb. Bundan bir gün əvvəl isə onun tabeliyində çalışan digər bir qadınla da sevgi münasibəti yaşadığı ortaya çıxıb.

"Reuters" noyabrın 12-də iki mənbəyə istinadla biznesmenin üçüncü qadınla – "Nvidia"nın daha bir əməkdaşı ilə yaxın münasibətlərinin olduğunu yazıb. Agentlik həmin qadının adını açıqlamayıb və onunla əlaqə yarada bilmədiyini vurğulayıb.

Yaranmış bu qalmaqal şirkətin səhmlərinin dəyərini kəskin şəkildə aşağı salıb.

Azərbaycan və Böyük Britaniya strateji tərəfdaş oldu

Böyük Britaniya və Azərbaycan bayraqları
Böyük Britaniya və Azərbaycan bayraqları

Noyabrın 12-də Dublində Azərbaycan Respublikası ilə Birləşmiş Krallıq arasında Strateji Tərəfdaşlıq haqqında Bəyannamə imzalanıb. Sənədə Azərbaycan prezidenti İlham Əliyev və Böyük Britaniya və Şimali İrlandiya Birləşmiş Krallığının baş naziri Endi Börnhem imza atıblar.

Əliyev Avropa Siyasi Birliyinin 9-cu Zirvə Toplantısında iştirak etmək üçün İrlandiyada səfərdədir.

Bəyannamədə tərəflər ilk növbədə müdafiə və təhlükəsizlik sahəsində əməkdaşlıq niyyətlərini ifadə edirlər. Onlar həmçinin ticarət və investisiya əlaqələrini genişləndirmək, eləcə də davamlı, inklüziv və şaxələndirilmiş iqtisadi artımı təşviq etmək kimi ortaq hədəflərini təsdiqləyirlər.

İki ölkə arasında bundan əvvəl 1994-cü il fevralın 23-də Dostluq və Əməkdaşlıq haqqında, 1998-ci il iyulun 21-də isə Dostluq Münasibətləri və Tərəfdaşlıq haqqında birgə bəyannamələr imzalanıb.

Azərbaycan indiyədək dünyanın bir çox digər ölkələri ilə də oxşar strateji sənədlərə imza atıb.

Əliyevlərin Londonda üç imarəti

No media source currently available

Azərbaycan Konstitusiyası 31 yaşına çatdı

Dəyişən Konstitusiya İlham Əliyevi necə superprezidentə çevirdi...

No media source currently available

Azərbaycanın müxtəlif vaxtlarda çoxsaylı dəyişiklik və əlavələr edilən Konstitusiyasının qəbul olunmasından 31 il keçir.

Mövcud Azərbaycan Konstitusiyası 31 il əvvəl, 1995-ci il noyabrın 12-də qəbul edilib.

Müstəqil Azərbaycanın bu ilk Konstitusiyası beş bölmə, 12 fəsil və 158 maddədən ibarət olub.

1995-ci ildən Konstitusiyaya üç dəfə — 2002-ci il avqustun 24-də, 2009-cu il martın 18-də və 2016-cı il sentyabrın 26-da referendum yolu ilə əlavə və dəyişikliklər edilib.

2002-ci il...

2002-ci il dəyişikliklərindən sonra ölkədə proporsional seçki sistemi ləğv edilib, baş nazir isə Milli Məclis sədrindən önə çıxaraq ölkədə ikinci şəxs statusu alıb. (Proporsional seçki sistemi səslərin ayrı-ayrı namizədlərə deyil, partiyalara verilməsini nəzərdə tutur. 2002-ci ilə qədər Azərbaycan parlamentində yerlərin beşdə biri, yəni 25 deputat bu sistemlə seçilirdi).

2009-cu il...

2009-cu ildə bir şəxsin ardıcıl iki dəfədən çox prezident seçilməsinə qoyulan qadağa aradan qaldırılıb. Bundan sonra prezident İlham Əliyev üçüncü, dördüncü və beşinci dəfə bu vəzifəyə seçilib.

2016-cı il...

Nəhayət, 2016-cı il referendumunda prezidentlik müddəti 5 ildən 7 ilə qədər artırılıb. Ölkədə vitse-prezidentlik institutu təsis edilib. Bundan bir il sonra — 2017-ci ildə ölkəyə 2003-cü ildən rəhbərlik edən İ.Əliyev xanımı Mehriban Əliyevanı Birinci vitse-prezident vəzifəsinə təyin edib.

Ümumilikdə hər üç referendumda ölkənin Əsas Qanununa çoxsaylı dəyişiklik və əlavələr edilib.

2009-cu ilə kimi Konstitusiya Günü qeyri-iş günü olsa da, həmin vaxtdan etibarən artıq iş günüdür.

İsrail Qəzzadakı xəstəxanada HƏMAS komandirini vurduğunu bildirir

Xan-Yunisdəki "Nasir" xəstəxanasının binası daxilindəki dağıntılar
Xan-Yunisdəki "Nasir" xəstəxanasının binası daxilindəki dağıntılar

Noyabrın 12-nə keçən gecə İsrail hərbçiləri Ümumi Təhlükəsizlik Xidməti (ŞABAK) ilə birlikdə Qəzza sektorunun cənubundakı Xan-Yunis şəhərində yerləşən "Nasir" xəstəxanasına zərbə endiriblər. İsrail ordusunun məlumatına görə, hücumun hədəfi ABŞ və Avropa İttifaqının terror təşkilatı kimi tanıdığı HƏMAS qruplaşmasının yüksəkrütbəli komandirləri olub. Daha sonra İsrail Müdafiə Qüvvələri (SAXAL) zərbə nəticəsində HƏMAS-ın Xan-Yunis bölgəsi üzrə briqada komandiri Məhəmməd Əbu İsmayılın öldürüldüyünü təsdiqləyib. Qruplaşmanın digər komandirləri də hücuma məruz qalıblar.

İsmayılın briqadanın fəaliyyətini əlaqələndirdiyi, eləcə də İsrail hərbçilərinə və mülki şəxslərinə qarşı əməliyyatların keçirilməsinə əmr verdiyi iddia olunur. O, HƏMAS-ın 2023-cü il oktyabrın 7-də İsrailə hücumu zamanı girov götürülmüş çoxsaylı şəxslərin saxlanılmasına görə də məsuliyyət daşıyıb.

İsrail ordusu bildirir ki, HƏMAS nümayəndələri xəstəxana ərazisində komanda məntəqəsi yaradıblar. Zərbədən əvvəl mülki əhalinin xəbərdar edilməsi üçün tədbirlər görüldüyü vurğulanır.

Qəzzanın Mülki Müdafiə Xidmətindən isə bildirilib ki, zərbə xəstəxananın cərrahiyyə şöbəsinə endirilib. Nəticədə azı altı nəfər həlak olub, təxminən 20 nəfər yaralanıb. Ölənlər arasında cərrah həkimin, yaralananlar arasında isə mülki şəxslərin olduğu iddia edilir. Öldürülən HƏMAS döyüşçülərinin sayı barədə məlumat verilmir. Qruplaşma bu hücumu "hərbi cinayət" adlandırıb.

Qəzzanın bir hissəsi hələ də HƏMAS-ın nəzarətindədir və bir ildən çoxdur ki, orada atəşkəs rejimi qüvvədədir. İsrail HƏMAS-la əlaqəli konkret şəxsləri zərərsizləşdirmək məqsədilə vaxtaşırı hədəfli zərbələr endirir.

Ötən ilin oktyabrından bəri Qəzzada 1500-dən çox fələstinlinin həlak olduğu bildirilir. Onlardan neçəsinin HƏMAS-la əlaqəli olduğu açıqlanmır.

Azərbaycan sənayesi kiçilib

Cənubi Qafqazda ÜDM ən az Azərbaycanda artır: Qonşuları niyə Bakını qabaqlaya bilir?

No media source currently available

Dövlət Statistika Komitəsinin (DSK) noyabrın 11-də açıqladığı məlumata görə, 2026-cı ilin yanvar-oktyabr aylarında sənaye sektorunda 58 milyard 539.6 milyon manat dəyərində məhsul istehsal edilib. Bu göstərici ötən ilin eyni dövrü ilə müqayisədə 0.7 faiz azdır.

Amma sənayedən fərqli olaraq, ümumi daxili məhsulda (ÜDM) qismən də olsa, artım müşahidə olunur. DSK bildirir ki, hesabat dövründə 115 milyard 930 milyon manatlıq məhsul istehsal edilib ki, bu da ötən ilin eyni dövrü ilə müqayisədə 1.7 faiz çoxdur.

Həm rəsmi qurumlar, həm də müstəqil iqtisadçılar ölkə sənayesindəki geriləməni əsasən neft-qaz sektorunda hasilatın aşağı düşməsi ilə əlaqələndirirlər. Məsələn, ötən il ölkədə 28 milyon tona yaxın neft çıxarılıb, halbuki 2009-cu ildə bu göstərici 50 milyon ton təşkil edirdi. Əvəzində bu il qazılan quyuların sayı artırılıb; hökumət neft hasilatındakı azalmanın qarşısını almaq istəyir.

Digər tərəfdən, bu il Yaxın Şərqdə sabitliyin pozulması və Hörmüz boğazında yaranan problemlər səbəbindən neft kəskin bahalaşıb, hətta Azərbaycan neftinin qiyməti 70 faiz civarında artıb. Müstəqil iqtisadçılar hesab edirlər ki, neftin kəskin bahalaşmasına baxmayaraq, sənayedəki geriləmə və DSK-nın açıqladığı 1.7 faizlik cüzi ÜDM artımı iqtisadiyyatda böhran təhlükəsinin yaxınlaşmasından xəbər verir.

17 sentyabr

Hökumət gələn il iqtisadiyyatın 2.7 faiz böyüyəcəyini desə də, ekspertlər buna şübhə edirlər

Azərbaycan hökuməti 2027-ci ildə ölkədə 141 milyard manatlıq ümumi daxili məhsul (ÜDM) istehsal olunacağını proqnozlaşdırır.

Bu barədə Maliyyə Nazirliyinin gələn il üzrə makroiqtisadi göstəricilərində qeyd olunub

Gələn il ölkə iqtisadiyyatının 2.7 faiz böyüyəcəyi gözlənilir.

Proqnoza əsasən, qeyri-neft-qaz sektorunda 4.4 faiz artım, neft-qaz sektorunda isə 1.8 faiz azalma nəzərdə tutulur.

Amma müstəqil iqtisadçılar belə bir artımın olacağına indidən şübhə ilə yanaşırlar. Onlar xatırladırlar ki, hökumət 2026-cı ildə iqtisadi artımın 3.5 faiz olacağını proqnozlaşdırsa, səkkiz ayın yekunlarına görə, bu göstərici cəmi 1.2 faiz təşkil edib.

Yaxın Şərqdəki münaqişələr fonunda bu il neft kəskin bahalaşıb. Ekspertlər vurğulayırlar ki, əsas ixracı neft və qazdan ibarət olan Azərbaycanda enerjidaşıyıcıların qiymətindəki ciddi artımdan sonra belə proqnozlar özünü doğrultmursa, bu, ölkə iqtisadiyyatında böhranın başlanğıcı kimi qiymətləndirilməlidir. Amma rəsmilər belə dəyərləndirmələri qəbul etmirlər.

Davamı

XS
SM
MD
LG