Ukraynanın təhlükəsizlik xidməti SBU bildirib ki, Gürcüstanın Daxili İşlər Nazirliyi və ABŞ-ın Mərkəzi Kəşfiyyat İdarəsini ilə birgə apardıqları əməliyyat nəticəsində Kiyev vilayətində İslam Dövləti ekstremist qruplaşmasının liderlərindən biri saxlanıb.
Gürcüstan vətəndaşı olan bu şəxsin Al Bara Shishani adı ilə tanındığı və ən geci 2012-ci ildən İŞİD üzvü olduğu xəbər verilir.
SBU-nun noyabrın 15-də açıqlanmış bəyanatında deyilir:
"O 2013-cü ildə İŞİD-də ən yüksək vəzifələrindən birini tutaraq Abu Umar ash-Shishani adı ilə tanınan hərbi əmirin müavini təyin edilib. 2016-cı ildə əmirin məhv edilməsindən sonra Al Bara Shishani Türkiyəyə keçib və oradan terrorçu təşkilatın fəaliyyətinin koordinasiyasını davam etdirib”.
Buna da bax: “Çeçen Omar”ın öldüyünü təsdiqləyirlər
SBU bildirir ki, Shishani 2018-ci ildə saxta pasportla Ukraynaya gəlib və burada yaşayır. O burada da terrorçuların fəaliyyətlərinin əlaqələndirilməsi ilə məşğul olub.
SBU bildirir ki, Shishani Kiyevin rayonlarından birində, yaşadığı evin qarşısında saxlanıb.
Onun barəsində keçirilmiş foto ekspertizası saxlananın həqiqətən də axtarışda olan İŞİD liderlərindən biri olduğu təsdiqlənib.
Hazırda Al Bara Shishani-nin Ukraynada baş vermiş cinayətlərlə mümkün əlaqələri araşdırılır.