Noyabrın 11-də Türkiyədə prokuror İstanbul Böyük Şəhər Bələdiyyəsinin həbsdə olan keçmiş sədri Əkrəm İmamoğluna 2 min ildən çox həbs cəzası tələb edib. O, dövlətə milyardlarla lirə zərər vurduğu iddia edilən genişmiqyaslı korrupsiya şəbəkəsinə rəhbərlikdə suçlanır. "Reuters" xəbəri əldə etdiyi ittiham aktına əsasən yayıb.
Prezident Rəcəb Tayyib Ərdoğanın əsas siyasi rəqibi sayılan İmamoğlu indiyədək bütün ittihamları rədd edib, onları siyasi motivli adlandırıb. Onun təmsil olunduğu müxalif, amma son bələdiyyə seçkilərində ən çox səs qazanan Cümhuriyyət Xalq Partiyası (CHP) son iddiaların "cəfəngiyat" olduğunu bildirir.
İstanbul baş prokuroru Akın Gürlək mətbuat konfransında ittiham aktını açıqlayıb. Sənəddə 402 nəfərin, o cümlədən Ə.İmamoğlunun adının yer aldığını, onların cinayətkar təşkilat yaratmaqda, rüşvət, dələduzluq və tender pozuntularında ittiham olunduğunu deyib. Gürlək şəbəkənin 10 il ərzində Türkiyəyə 160 milyard lirə (3.8 milyard dollar) zərər vurduğunu iddia edib.
CHP-nin İstanbul təşkilatının rəhbəri Özgür Çelik X platformasında yazıb ki, ittiham aktı "mənasız" və "utancvericidir". Onun sözlərinə görə, məqsəd İmamoğlunun Türkiyə prezidenti olmaq ümidlərini məhv etməkdir.
İstanbul bələdiyyəsi, İmamoğlunun vəkilləri mətbuatın şərh sorğularına cavab verməyiblər.
Bu arada İstanbul prokuroru Ali Məhkəmədən CHP-nin bağlanmasını istəyib. Prokurorluq müraciətində partiyanın qanunsuz vəsaitlərlə maliyyələşdirildiyini iddia edib, onu qanunazidd hərəkətlərdə günahlandırıb.
27 oktyabr
Əkrəm İmamoğlu barəsində bu dəfə 'siyasi casusluq' ittihamı ilə həbs qərarı çıxarılıb
Türkiyədə məhkəmə İstanbul Böyük Şəhər Bələdiyyəsinin həbsdə olan sədri Əkrəm İmamoğlu barəsində "siyasi casusluq" şübhəsi ilə daha bir formal həbs qərarı çıxarıb. Bu barədə oktyabrın 27-də "Anadolu" dövlət agentliyi məlumat yayıb.
Prezident Rəcəb Tayyib Ərdoğanın əsas rəqiblərindən sayılan İmamoğlu martdan bəri korrupsiya ittihamı ilə bağlı həbsdədir. Ona iyulda İstanbul baş prokuroruna qarşı təhqir və hədəyə görə əlavə həbs cəzası kəsilib.
İmamoğlu barəsindəki bütün ittihamları rədd edir.
Casusluq ittihamını isə o, bazar günü, oktyabrın 26-da məhkəmədə, həmçinin cümə günü həbsxanadan verdiyi açıqlamada təkzib edib.
"Belə bir böhtan, yalan və sui-qəsd şeytanın ağlına belə gəlməzdi! Biz sözlə, ifadə edilməyəcək qədər utandırıcı bir ədəbsizliklə üz-üzəyik!", – o, X platformasında yazıb.
"Anadolu" xəbər verir ki, İstanbul məhkəməsi gecə saatlarında İmamoğlu və daha iki nəfər, o cümlədən "Tele1" xəbər kanalının baş redaktoru Mərdan Yanardağ haqqında həbs qərarı çıxarıb.
Hökuməti tənqid edən "Tele1" kanalı oktyabrın 24-də qəyyum təyini ilə dövlətin nəzarətinə verilib. Rəsmilər bu addımı casusluq ittihamları ilə əsaslandırıblar.
Məhkəmənin son qərarına görə, İmamoğlu "prezidentliyə namizədliyi üçün vəsait toplamaq məqsədilə korrupsiya" və "beynəlxalq dəstəkdən ötrü də casusluq" fəaliyyətində ittiham olunur.
İmamoğlunun təmsil etdiyi Cümhuriyyət Xalq Partiyasının (CHP) yüzlərlə üzvü və bələdiyyələrə seçilmiş təmsilçiləri korrupsiya ilə bağlı müxtəlif ittihamlarla üzləşib. Partiya bu prosesləri siyasi motivli və antidemokratik adlandırır. CHP korrupsiya iddialarını hökumətin Ərdoğanın potensial seçki rəqiblərini aradan qaldırmağı hədəfləyən siyasi gedişləri kimi qiymətləndirir. Hökumət bu ittihamları rədd edir.
Sizin brauzer HTML5-i dəstəkləmir
CHP qalib gəldi, amma İmamoğlu bu dəfə casusluqda ittiham edilir
24 oktyabr
Məhkəmə Özgür Özəlin sədr seçildiyi qurultayın nəticələrini ləğv etmədi
Türkiyədə məhkəmə CHP-nin 2023-cü il qurultayının nəticələrinin ləğvi ilə bağlı işi rədd edib. Həmin qurultayda iddia olunan pozuntularla bağlı işin artıq mahiyyətini itirdiyi bildirilib. Məhkəmənin qərarında partiyanın keçən ay fövqəladə qurultayında Özgür Özəli yenidən sədr seçməsi də qeyd olunub.
"Reuters" yazır ki, bu qərar bir ildən çox çəkən misilsiz hüquqi təzyiqdən sonra prezident R.T.Ərdoğanın rəqibləri üzərindəki gərginliyi bir qədər azaldıb.
Qərardan sonra Türkiyə aktivləri dəyər qazanıb. "Borsa İstanbul" indeksi (.XU100) 4 faizdən çox artıb, lirə isə dollara qarşı möhkəmlənib.
Özəl martda İstanbul Böyük Şəhər Bələdiyyəsinin başqanı, partiyadan prezidentliyə namizədi Əkrəm İmamoğlunun həbsindən sonra daha çox tanınıb. İmamoğlu prezident Rəcəb Tayyib Ərdoğanın əsas siyasi rəqibi sayılır.
Rəy sorğularının çoxunda bu partiya Ərdoğanın islamyönümlü, mühafizəkar Ədalət və İnkişaf Partiyası (AKP) ilə təxminən eyni səviyyədədir.