Milli Şura Koordinasiya Mərkəzinin və Müsavat Partiyasının həbsdə olan üzvü Tofiq Yaqublunun səhhətinin ağırlaşdığı, yeriməkdə çətinlik çəkdiyi bildirilir.
Siyasətçinin qızı Nigar Həzi deyir ki, bu gün, martın 13-də vəkil hələ də aclıq aksiyasını davam etdirən atası ilə görüşüb: "Vəkil bizə Tofiq Yaqublunun xeyli çəki itirdiyini, daha da halsızlaşdığını, yeriməkdə çətinlik çəkdiyini, rənginin ötəndəfəkindən bir az daha tutqunlaşdığını bildirdi. Bu gün həkim müayinəsi ilə vəkil görüşü üst-üstə düşdüyü üçün o, əvvəlcə vəkillə görüşə gəlib. Müayinə isə görüşdən sonra olacaqdı. Çox güman ki, artıq müayinə olub, ancaq biz bu barədə yalnız sabahkı zəng günündə biləcəyik".
Qızının vurğulamasına görə, T.Yaqublu vəkilə deyib ki, baş gicəllənmələri daha da artıb: "Hətta dünən bir dəfə huşunu belə itirib".
Bu açıqlamaya Penitensiar Xidmət və başqa rəsmi qurumlardan münasibət almaq mümkün olmayıb.
10 mart
Tofiq Yaqublu müayinə edilib
Milli Şura Koordinasiya Mərkəzinin həbsdə olan üzvü Tofiq Yaqublunu martın 9-10-da həkimlər müayinə edib.
Bununla bağlı T.Yaqublu ilə görüşən vəkil Nemət Kərimliyə istinadən siyasətçinin qızı Nigar Həzi məlumat yayıb: "Müayinə zamanı onun 15 gün içində 10 kq çəki itirdiyi, təzyiqinin isə aşağı - 60/90 olduğu bəlli olub. Vəkil də görüş zamanı Tofiq Yaqublunun xeyli çəki itirdiyinin, səsinin zəiflədiyinin, rənginin tutqunlaşdığının şahidi olub".
N.Həzi vurğulayıb ki, T.Yaqublunun həyatına görə Əliyev hakimiyyəti məsuliyyət daşıyır.
Bu açıqlamaya Penitensiar Xidmət və başqa cavabdeh rəsmi qurumlardan münasibət almaq mümkün olmayıb.
1 mart
Ailəsi Tofiq Yaqublu ilə görüşüb
Martın 1-də ailəsi Milli Şura və Müsavat Partiyasının həbsdə olan üzvü Tofiq Yaqublu ilə görüşüb.
Qızı Nigar Həzi görüşdən qayıtdıqdan sonra bildirib ki, atası artıq səkkiz gündür aclıq aksiyası keçirir: "Ata səkkiz gündə xeyli arıqlayıb. Gözləri çuxura düşüb. Görünən odur ki, bu dəfə çəki itkisi çox sürətlə gedəcək... Görüş şüşə arxasında keçdi".
N.Həzinin vurğulamasına görə, rəis müavinləri və müəssisə işçiləri atasının kamerasına gəliblər: "Kameraya daxil olanlar kameradan "qanunsuz əşya" olaraq qazan, dabankeş, suqızdırıcı, elektrik çaydan və bəzi əşyaları götürüblər. Rəis müavinlərindən biri isə kamerada kobudcasına çığır-bağır salaraq yüksək səslə ataya deyib ki, "Nə?! Siz mane olursuz axtarışa? Rəisin yanına getmək istəyirsiz? Qolunu qandallayın, rəisin yanına aparın!". Bundan sonra isə onu kameradan çıxarıblar".
Qızı T.Yaqublunun artıq bununla həbsdə beşinci dəfə aclıq aksiyası keçirdiyini vurğulayaraq onun səhhətindən və taleyindən narahatlıqlarını ifadə edib.
Bu açıqlamaya cavabdeh rəsmi qurumlardan münasibət almaq mümkün olmayıb.
25 fevral
Nigar Həzi: 'Tofiq Yaqublu karserə salınıb...'
Milli Şura və Müsavat Partiyasının hazırda həbsdə olan üzvü Tofiq Yaqublu cərimə kamerasına (karser) salınıb. Bu barədə onun vəkilinə istinadən qızı Nigar Həzi məlumat yayıb.
N.Həzi vurğulayıb ki, fevralın 25-də T.Yaqublunun zəng etmək günü olsa da, zəng vurmayıb: "Vəkili onunla görüşüb və məlum olub ki, Tofiq Yaqublu üç gündür karserə salınıb. Hələ də karserdədir. Onun barəsində 7 sutka karser cəzası verilib. Guya Tofiq Yaqublu kamerada axtarışa mane olub".
N.Həzi artıq atasının etiraz əlaməti olaraq aclıq aksiyasına başladığını bildirib.
"İlham Əliyev Vaşinqtonda üzləşdiyi gerçəkliyin heyfini Tofiq Yaqubludan və digər siyasi məhbuslardan çıxır", - o vurğulayıb.
Bu açıqlamaya Penitensiar Xidmətdən münasibət almaq mümkün olmayıb.
Fevralın 19-da sosial mediada ABŞ-də yaşayan və Azərbaycan hökumətinin tənqidçilərindən olan mühacirlərin etiraz aksiyasından görüntülər yayılıb. Onlar prezident İlham Əliyevin Vaşinqtonda qaldığı deyilən otelin önündə "siyasi məhbuslara azadlıq", "Tofiq Yaqubluya azadlıq" şüarları səsləndiriblər.
İ.Əliyev fevralın 19-da Sülh Şurasının ilk iclasında iştirak üçün ABŞ-də səfərdə olub.
Yayılan videoda aksiya iştirakçıları prezidentin mühafizə xidmətinin əməkdaşlarının etirazçılara zor tətbiq etdiyini bildirir. Həmin etirazçılar arasında T.Yaqublunun oğlu Rəhim Yaqublu da olub.
Azərbaycanın Birləşmiş Ştatlardakı səfirliyi isə bildirib ki, fevralın 19-da prezident Əliyevin Sülh Şurasının ilk iclasında iştirak məqsədilə səfəri zamanı bir qrup etirazçı Vaşinqton şəhərində "Waldorf Astoria" mehmanxanasının qarşısında "təxribatçı hərəkətlər" törədib. Səfirliyin bəyanatına görə, prezident korteji mehmanxana ərazisinə yaxınlaşarkən, etirazçılar mühafizə olunan əraziyə zorla daxil olmağa cəhd edib və prezident avtomobilinə yönəlik hücum aktları həyata keçiriblər: "...Prezidentin Təhlükəsizlik Xidmətinin dərhal müdaxilə etməkdən başqa seçimi qalmayıb".
Sizin brauzer HTML5-i dəstəkləmir
Vaşinqtondakı 'dava' - Təxribat, yoxsa dözümsüzlük?
05.11.2025
Tofiq Yaqublu Ali Məhkəmədə: '0.1 faiz ədalət olsa, təqsirsiz olduğumu qəbul edərsiniz'
Noyabrın 5-də Ali Məhkəmədə Milli Şura və Müsavat Partiyasının üzvü, iki ilə yaxındır həbsdə olan Tofiq Yaqublunun işinə baxılıb. Prosesə siyasətçinin özü də qatılıb.
Məhkəmə prosesinə sədrlik edən hakim İlqar Qılıcov T.Yaqubludan çıxış etmək fikrinin olub-olmadığını soruşarkən, siyasi fəal çıxış etmək istədiyini söyləyib.
Hakim bildirib ki, Ali Məhkəmə işlərə aşağı instansiya məhkəmələrində baxılan zaman prosessual pozuntulara yol verilib-verilmədiyini araşdırır və bu üzdən, təqsirləndirilən şəxslərin burada geniş çıxış etmək imkanı olmasa da, T.Yaqubluya çıxışına şərait yaradılacaq: "Bu günə çox məhkəmə prosesi təyin olunub, vaxt problemi var. Ona görə də növbəti iclasın vaxtını müəyyənləşdirib təyin edərik, siz də həmin gün ətraflı çıxış edərsiniz".
T.Yaqublu cavab verib ki, əgər çıxışda səsləndirilən arqumentlərə, təqsirsizliyini sübut edən faktlara əhəmiyyət verilməyəcəksə, heç məhkəmə prosesini təxirə salmağa ehtiyac yoxdur: "Əgər aşağı instansiyalardakı kimi davranacaqsınızsa, prosesi təxirə salmağa ehtiyac yoxdur, qərarı elan edin, bitsin. Mənim sizdən də ədalət gözləntim yoxdur. Çox yox, 0.1 faiz ədalət və ləyaqət istəyirəm. Bunlar olsa, mənim təqsirsiz olduğumu qəbul edib, barəmdəki cinayət işinə xitam verərsiniz".
Prosesdə T.Yaqublunun vəkili Nemət Kərimli və prokuror çıxış etməyib.
Hakim bu iş üzrə məhkəmənin növbəti üç həftə ərzində keçiriləcəyini, vaxt dəqiqləşəndə tərəflərə məlumat veriləcəyini deyib.
Xatırlatma
T.Yaqublu 2023-cü il dekabrın 14-dən həbsdədir. Bakı Ağır Cinayətlər Məhkəməsinin hökmüylə ona 9 il həbs cəzası kəsilib. Siyasətçi Cinayət Məcəlləsinin 178.3.2-ci (külli miqdarda ziyan vurmaqla dələduzluq) və 320-ci (saxta sənəd hazırlama və ya istifadə etmə) maddələriylə təqsirli bilinib.
Bakı Apellyasiya Məhkəməsi də hökmü qüvvədə saxlayıb.
T.Yaqublu özünü təqsirli bilmir və qurama ittihamla şərlənərək həbs olunduğunu bildirir.
Siyasi fəal daha öncə də dəfələrlə uzun müddət həbsdə olub.
Yerli və beynəlxalq insan haqları təşkilatları onun adını siyasi məhbus siyahılarına daxil edib.
Azərbaycan rəsmiləri isə ölkədə siyasi məhbusların olması fikrini qəbul etməyərək deyirlər ki, adları siyasi məhbus siyahılarında yer alan şəxslər törətdikləri əmələ görə mühakimə olunublar.