Latviya və Litva hökumətləri Serbiya prezidenti Aleksandar Vuçiçin 9 May paradına qatılmaq üçün Moskvaya gedərkən bu ölkələrin hava məkanlarından keçməsinə icazə verməkdən imtina edib.
Bu barədə Serbiyanın "Kurir" və "Novosti" nəşrləri məlumat yayıb. Bildirilib ki, Latviya hökuməti qadağanı "uçuşun məqsədinin siyasi həssaslığı" ilə izah edib, Litva isə "texniki və diplomatik həssaslıq" səbəbindən imtina edib.
Müvafiq ölkələrin rəsmiləri, hələlik, bu məlumata münasibət bildirməyib.
Həmçinin, "Kurir" xəbər verir ki, Slovakiyanın baş naziri Robert Fitsonun Polşa və Litvanın hava məkanından uçuşu qadağan edilib. Həm Vuçiç, həm də Fitso Moskvada təşkil olunacaq Qələbə günü tədbirlərində iştirak edəcək liderlər siyahısındadır.
Mayın 3-də Serbiya prezidenti A.Vuçiç səhhətindəki problem səbəbindən ABŞ-yə rəsmi səfərini yarımçıq qoyaraq Belqrada qayıdıb və xəstəxanaya yerləşdirilib. Ertəsi gün, Serbiyanın maliyyə naziri Sinişa Mali bildirib ki, hələlik Vuçiçin 9 mayda Moskvada Qırmızı Meydanda keçiriləcək parada gedib-getməyəcəyi dəqiq deyil.
Maliyyə naziri RTS televiziyasına müsahibəsində deyib ki, prezident sağaldıqdan sonra ictimaiyyətə müraciət edəcək. "Onu tanıyaraq, sözünün adamı olduğunu nəzərə alaraq, o, orada olacağını dedi, güman edirəm ki, vədini yerinə yetirəcək".
Daha əvvəl Vecim mayın 9-da keçiriləcək parad üçün Moskvaya gedəcəyini bildirmişdi. Bunun ardınca Avropa Komissiyası Serbiya prezidentinə xəbərdarlıq edib ki, onun Rusiyaya səfəri ölkənin Aİ-yə daxil olması ilə bağlı danışıqları çətinləşdirəcək.
Slovakiyanın baş naziri R.Fitso da mayın 9-da keçiriləcək qələbə paradında iştirak etmək üçün Moskvaya səfər planlaşdırdığını açıqlayıb.