Naxçıvan Ali Məclisinin qərarı ilə Naxçıvan Muxtar Respublikasının (MR) baş naziri Səbuhi Məmmədov tutduğu vəzifədən azad edilib. O, 2020-ci ildən bu vəzifəni tuturdu.
Ali Məclisin digər qərarı ilə bu vəzifəyə Ceyhun Cəlilov təyin olunub.
Dosye
Ceyhun Cəlilov 1987-ci ildə Naxçıvan Muxtar Respublikasının Şahbuz şəhərində doğulub.
2009-cu ildə Azərbaycan Dövlət İqtisad Universitetinin Beynəlxalq iqtisadi münasibətlər ixtisası üzrə bakalavr, 2012-ci ildə Azərbaycan Dövlət İqtisad Universitetinin eyni ixtisası üzə magistratura, 2013-cü ildə isə Böyük Britaniyanın Esseks Universitetinin Maliyyə ixtisası üzrə magistratura səviyyəsini bitirib.
2011-2013-cü illərdə İqtisadi İnkişaf Nazirliyinin (indiki İqtisadiyyat Nazirliyi) Beynəlxalq təşkilatlarla əməkdaşlıq şöbəsində, 2013-2021-ci illər ərzində "BP Caspian" şirkətinin Maliyyə departamentində müxtəlif vəzifələrdə çalışıb.
1 mart 2021-ci il tarixində Dayanıqlı və Operativ Sosial Təminat (DOST) Agentliyinin İdarə Heyətinin sədrinin müşaviri, 13 avqust 2021-ci il tarixində isə İdarə Heyəti sədrinin müavini vəzifəsinə təyin edilib.
Baş nazir təyinatına qədər Naxçıvan MR əmək və əhalinin sosial müdafiəsi naziri postunu tuturdu.