Yanvarın 7-də dünyada milyonlarla pravoslav xristian Milad bayramını qeyd edib.
Əsasən pravoslav xristianların yaşadığı Rusiyada dini inanclılar Moskvada və ölkənin digər yerlərində kilsələrə axışıblar.
Ukraynada da xristianların çoxu pravoslavlardır, amma bu il ölkədə Milad rəsmən yanvarın 7-də deyil, katolik xristianlarla birlikdə, dekabrın 25-də bayram edilib. Buna prezident Volodimir Zelenski iyulda qərar verib. Ancaq buna baxmayaraq, yanvarın 7-nə keçən gecə minlərlə ukraynalı kilsələrdə izdiham yaradıb. Zelenskinin qərarı Ukraynanın Rusiyanın dominant olduğu ənənələrdən uzaqlaşmaq cəhdinin əlaməti sayılır. Fevralın sonunda Rusiyanın Ukraynanı işğal etməsinin ikinci ili tamam olur.
Ukrayna Pravoslav Kilsəsi hələ 2019-cu ildə Rusiya Pravoslav Kilsəsindən ayrılıb. Ancaq Ukrayna Pravoslaviyasının kiçik bir qanadı Moskvaya sadiqdir və tərəflər Kiyev monastırı üzərində nəzarəti paylaşa bilmirlər.
Əsasən Ukraynanın qərbində yaşayan xristian azlığı katoliklərdir.
Rusiya prezidenti Vladimir Putin Moskva yaxınlığındakı Noqo-Oqaryovo iqamətgahındakı milad ibadətinə Ukraynada müharibədə öldürülən əsgərlərin yaxınları ilə birlikdə qatılıb.
Ötən ildən fərqli olaraq, Putin bayram atəşkəsinə çağırmayıb.
Qərbin hesablamalarına görə, Rusiyanın müharibədə itkisi ölü və yaralılar daxil olmaqla 320 mini keçib.
Milad bayramı Belarusda, Monteneqroda, Serbiyada, digər ölkələrdə qeyd olunub.