Müəllimlərin məktəb geyimi ilə bağlı tələblər qoyulacaq. Bu qərar Milli Məclisin bu gün — iyulun 7-də keçirilən iclasında "Ümumi təhsil haqqında" qanuna təklif edilən dəyişikliklərdə əksini tapıb.
Qanun layihəsinə əsasən, dövlət məktəblərində müəllimlərin geyim qaydalarını müvafiq icra qurumu müəyyən edəcək.
Hazırda dövlət məktəblərində yalnız şagirdlər üçün vahid geyim forması məcburidir. Yeni qaydaya əsasən, uşaqların məktəbli forması geyinməsinə nəzarət etmək valideynlərin üzərinə vəzifə olaraq qoyulur.
Qanun layihəsi səsverməyə çıxarılaraq üçüncü oxunuşda qəbul olunub.
Xatırlatma
Ölkədə vahid məktəbli forması ilk dəfə 2011-ci ildə tətbiq olunub. İndiki məcburi vahid geyim qaydasına keçid isə 2022-ci ildən başlayıb və 2023-2024-cü tədris ilindən tam reallaşıb.
Ötən müddətdə bəzi illərdə məktəbli formalarının vaxtında tapılmaması tez-tez şikayətlərə yol açıb. Vətəndaşlar isə əsasən qiymətlərin yüksək olmasından gileylənirlər.
Ekspertlər hesab edirlər ki, hökumət təhsilin yalnız formal tərəfinə deyil, həm də məzmununa diqqəti artırmalıdır.