Azərbaycan paytaxtı Bakının Binə qəsəbəsində 149 saylı orta məktəbdə kütləvi zəhərlənmə baş verdiyi bildirilir.
15 şagird xəstəxanaya aparılıb.
Tibbi Ərazi Bölmələrini İdarəetmə Birliyindən (TƏBİB) “Turan” Agentliyinə deyilib ki, aprelin 18-də Bakı Şəhəri Təcili və Təxirəsalınmaz Tibbi Yardım Stansiyasının briqadaları 15 məktəblini (8-i qız, 7-si oğlan) Kliniki Tibbi Mərkəzin Toksikologiya şöbəsinə təxliyə ediblər:
“Onlara zəruri tibbi xidmətlər göstərilib. 9 nəfər ambulator müalicə üçün artıq evə buraxılıb. Hazırda 6 nəfərin müalicəsi davam etdirilir. Vəziyyətləri stabildir".
Azərbaycan Qida Təhlükəsizliyi Agentliyinin (AQTA) Mətbuat xidmətindən isə deyilib ki, baş verən hadisənin səbəbləri, həmçinin qida zəhərlənməsi olub-olmaması ilə bağlı onların mütəxəssisləri ilə müvafiq qurumların əməkdaşları araşdırmalara başlayıblar:
"Araşdırmaların nəticələri ilə bağlı ictimaiyyətə məlumat veriləcək".
Bu ayın 7-də Bakı şəhəri 20 nömrəli məktəb-liseydə dəşagirdlərin kütləvi zəhərlənməsinin baş verdiyi açıqlanmışdı. Onda isə 6 şagird xəstəxanaya aparılmışdı.
Həmin vaxt məktəbin büfetindən toyuq əti alan uşaqlarda qarın ağrıları müşahidə edildiyi deyilirdi.
Baş Prokurorluqdan da bildirildi ki, Bakı şəhəri 20 nömrəli məktəb-liseydə həmin fakt üzrə Yasamal Rayon Prokurorluğunda araşdırma aparılır.