Bundestaq ikinci cəhddən Fridrix Mertsin Almaniya kansleri vəzifəsinə namizədliyini təsdiqləyib. Parlamentin 630 deputatından 316-sının səsi tələb olunduğu halda, onun lehinə 325 deputat səs verib.
Merts ilk cəhdində kansler ola bilmədi
Almaniyada federal kansler postuna namizəd Fridrix Merts mayın 6-da Bundestaqda keçirilən ilk səsvermədə bu vəzifəyə təsdiqlənmək üçün kifayət qədər səs toplaya bilməyib.
Gizli səsvermə zamanı Mertsin lehinə cəmi 310 deputat səs verib, halbuki təsdiq üçün 316 səs tələb olunurdu. 307 parlamentari isə onun əleyhinə səs verib.
Bununla belə, Mertsin lideri olduğu CDU/CSU bloku və onunla koalisiyaya daxil olan sosial-demokratlar Bundestaqda çoxluğa malikdirlər – onların 328 mandatı var. Səsvermənin nəticələri göstərir ki, gələcək hakim koalisiyanın bir sıra deputatları Mertsi dəstəkləməyiblər və ya hətta ona qarşı səs veriblər.
Bundestaqın iclasında fasilə elan olunub. Kansleri seçmək üçün təkrar cəhd 14 gün ərzində baş tutmalıdır. Almaniya mediası ehtimal edir ki, mayın 6-da səsvermə keçirilməyəcək.
Səsvermənin nəticəsini "Almaniya üçün Alternativ" (AfD) ifrat sağçı partiya alqışlayıb. Bu partiya yeni çağırış Bundestaqda ən böyük müxalifət qüvvəsinə çevrilib. Müxalifətdəki Sol və Yaşılların nümayəndələri də Mertsin uyğun namizəd olub-olmaması barədə düşünməli olduğunu bildiriblər.
Agentliklər baş verənləri "şok" kimi təsvir edirlər. Bu, Almaniya Federativ Respublikasının tarixində misli görünməmiş hadisədir. Almaniya Konstitusiyasına görə, əgər kanslerliyə namizəd 14 gün ərzində mütləq səs çoxluğunu toplaya bilməzsə, o, nisbi səs çoxluğu ilə də seçilə bilər. Lakin siyasi baxımdan səsvermənin nəticəsi istənilən halda Merts üçün ciddi zərbə sayılır.
Hazırda kansler vəzifəsini sosial-demokrat Olaf Şolts icra edir.
CDU/CSU və SDP koalisiya sazişi imzalayıblar. Bu saziş, əsasən, kompromis xarakterlidir. Tərəflər miqrasiya siyasətinin sərtləşdirilməsi və müdafiə xərclərinin artırılması barədə razılığa gəliblər. Sənəddə, həmçinin, Ukraynaya dəstəyin davam etdirilməsinin vacibliyi vurğulanır.