Sentyabrın 26-da «Dalğa» Gənclər Hərəkatı təhsildə köklü islahatlar tələbi ilə aksiya keçirməyə cəhd edib. Saat 15.00-da Sahil bağında toplaşan gənclər ayaqyalın gəzmək istəyiblər. Onlardan qabaq bağa gələn polis gəncləri saxlayıb. İştirakçılardan bəziləri Nizami küçəsinə tərəf qaçıblar. Ümumiyyətlə iştirakçılardan 17 nəfəri saxlanılaraq, Səbayil rayon 39-cu polis bölməsinə aparılıblar.
Bölmənin rəisi Dədəhəsən Rzayev bildirib ki, aksiya qanunsuz olduğundan iştirakçılar saxlanılıb və izahat alındıqdan sonra azad ediləcəklər. Saat 17.30 radələrində saxlanılanlar sərbəst buraxılıblar.
Aksiya iştirakçıları heç bir şüar səsləndirmədən, plakat qaldırmadan ayaqyalın gəzmək istəyiblər. Tələblər təhsil sahəsində islahatlar, o cümlədən Bolonya prosesindən irəli gələn öhdəliklərin yerinə yetirilməsi, xaricdə təhsil almaq üçün göndərilən tələbələrin seçimində şəffaflığın təmin edilməsi, təhsildə rüşvətə qarşı sistemli mübarizənin aparılması, dərs saatlarının tələbələrin istəklərinin nəzərə alınaraq müəyyənləşdirilməsi və s. olub.