«Azərbaycanda orduya və digər təhlükəsizlik qurumlarına mülki nəzarətlə bağlı problemlər var».
Bunu Bakıda səfərdə olan NATO Parlament Assambleyası (PA) missiyasının başçısı bolqarıstanlı Çətin Kazak deyir. O, sentyabrın 20-də Xarici İşlər naziri Elmar Məmmədyarovla görüşüb. Kazakın sözlərinə görə, hazırda Azərbaycanın qarşısında iki əsas məsələ durur; neft-qazın ixracı, vəsaitlərin düzgün xərclənməsi və Qarabağ münaqişəsinin həlli: «Birincini Azərbaycan özü bacarır, ikincinin isə həllinə yaxın vaxtlarda ümid yoxdur».
Ç.Kazak bildirir ki, NATO PA bu problemləri yaxından öyrənəcək və özünün qış sessiyasında müzakirə edəcək: «Biz ölkə üzərində nəzarəti saxlayacağıq. Araşdırmalarımızı və hökumətə dəstəyimizi davam etdirəcəyik».
NATO Parlament Assambleyası missiyası Bakıya sentyabrın 18-də gəlib. Səfərin sentyabrın 21-də başa çatacağı gözlənilir.