Avqustun ilk ongünlüyündə «Bakı-Xəbər» qəzetinin nəşrini bərpa edəcəyi gözlənir. Bu barədə «Azadlıq» radiosuna adıçəkilən nəşrin baş redaktoru Aydın Quliyev məlumat verib.
«Bakı-Xəbər» qəzeti bu il mayın 31-də nəşrini dayandırıb. Buna məhkəmə cərimələri ilə bağlı nəşrin maliyyə hesablarına həbs qoyulması səbəb olub. Qəzet üst-üstə 20 milyon köhnə Azərbaycan manatı məbləğində cərimə edilib.
Ancaq bu il iyulun 13-də Səbail Rayon Məhkəməsində çıxarılan qətnamə ilə qəzetin maliyyə hesablarına həbs qoyulması qərarı müvəqqəti götürülüb. Həmin qətnaməyə görə, qəzetin nəşri bərpa edildikdən sonra bir il ərzində bütün cərimələr ödənilməlidir. Aydın Quliyev deyir ki, bu qətnamə onlara qəzetin nəşrini bərpa etməyə imkan yaradır.