İyunun 20-də səhər saat 7-də Bakıda dənizkənarı parkda yerləşən keçmiş «Drakon», indiki «İkssayt» restoranında güclü partlayış baş verib. Səbail rayon polisinin əməkdaşlarının verdiyi məlumata görə, gecə saat 1-dən 6-dək həmin restoranda gənclərin şənliyi keçirilib.
80-dən artıq gəncin iştirak etdiyi mərasim başa çatandan bir saat sonra restoranda partlayış baş verib. İlkin ehtimala görə, hadisəyə qaz sızması səbəb olub. «İçəridə qaz balonundan qaz sızması olub. Xəsarət alan yoxdur, mühafizəçi salamat qalıb»,- deyə Səbail polis idarəsini ictimai təhlükəsizlik idarəsinin rəisi Məmməd Qədimov ANS-ə bildirib.
Hadisə zamanı restoranda yalnız mühafizə xidmətinin bir əməkdaşı olub ki, o da partlayışdan sağ çıxa bilib. Hazırda Fövqəladə Hallar Nazirliyinin əməkdaşları hadisə yerindədir. Ziyanın məbləği dəqiqləşdirilir.