Fevralın 2-də Apellyasiya İqtisad Məhkəməsi 1 saylı Yerli İqtisad Məhkəməsinin «Azadlıq» qəzetinin Xaqani-33 ünvanındakı binadan çıxarılması ilə bağlı qərarını qəvvədə saxlayıb.
Ötən il noyabrın 24-də 1 saylı Yerli İqtisad Məhkəməsi Dövlət Əmlakının İdarə Edilməsi üzrə Dövlət Komitəsinin iddiasına baxaraq «Azadlıq» qəzetinin həmin binadan çıxarılması ilə bağlı qərar vermişdi. Elə həmin gün də polis məhkəmənin qərarını icra etmişdi. Bu qərarla da «Azadlıq» qəzetindən başqa, orada məskunlaşan AXCP, «Turan» İnformasiya Agentliyi və daha bir neçə qurum da Xaqani-33 ünvanındakı binadan çıxarılmışdı.
Fevralın 2-də Apellyasiya İqtisad Məhkəməsi hakim Raziyyə Ataşovun sədrliyi ilə həmin qərara etiraz edən «Azadlıq» qəzetinin və digər sözügedən qurumların şikayətini əsassız sayıb.
«Azadlıq» qəzetinin texniki direktoru Azər Əhmədov deyir ki, onlar axıra qədər mübarizə aparmaq niyyətindədirlər. Cənab Əhmədovun sözlərinə görə, əgər Azərbaycandakı məhkəmə instansiyaları onların şikayətlərini əsassız saymaqda davam etsələr, Avropa İnsan Hüquqları Məhkəməsinə müraciət edəcəklər.