Yanvarın 31-i Müsavat partiyasının üzvləri Azərbaycan Xalq Cümhuriyyətinin yaradıcılarından biri Məmməd Əmin Rəsulzadənin doğum günü ilə bağlı onun Novxanı kəndindəki abidəsi önündə mitinq keçiriblər. Mitinqdə M.Ə.Rəsulzadənin Azərbaycanın istiqlal tarixində rolundan bəhs ediblər. Ancaq, hazırda ona layiqincə qiymət verilmədiyi bildirilib. Müsavat başqanı İsa Qəmbər M.Ə.Rəsulzadənin unudulmasının yolverilməz olduğunu söyləyib və əlavə edib ki, o, bütün ömrünü Azərbaycanın istiqlalına həsr edib.
Mitinq başa çatdıqdan sonra aksiya iştirakçıları M.Ə.Rəsulzadənin Novxanı kənd qəbiristanlığında dəfn olunmuş atası Hacı Molla Ələkbərin və digər yaxınlarının məzarını ziyarət ediblər.
Müsavat partiyasının ilk lideri M.Ə.Rəsulzadə 1884-cü il yanvar 31-də Bakıda ruhani ailəsində anadan olub. 1922-ci ildən onun mühacirət həyatı başlayıb. Müxtəlif illərdə o, Türkiyədə, Polşada, Almaniyada yaşayıb, Azərbaycan istiqlalı uğrunda mübarizəsini davam etdirib. 1955-ci ilin mart ayında M.Ə.Rəsulzadə Ankara şəhərində vəfat edib.