Ticarət, ictimai iaşə, məişət və başqa xidmətlərin göstərilməsi zamanı malların daşınması üçün nəzərdə tutulan qalınlığı 15-50 mikron, qulplu, qulpsuz, yüngülçəkili polietilen torbalar ayrıca məhsul kimi təqdim ediləcək.
Bununla bağlı Baş nazir Əli Əsədov fevralın 2-də "Azərbaycan Respublikasında ticarət, ictimai iaşə, məişət və digər növ xidmət Qaydaları"nda dəyişiklik edilməsi haqqında qərar imzalayıb.
Qərara əsasən, həmin məhsulların ayrıca təqdim edildiyi və satış qiyməti barədə istehlakçıya əvvəlcədən məlumat verilməlidir.
Nazirlər Kabinetindən izah
Nazirlər Kabineti ticarət və ictimai iaşə müəssisələrində polietilen torbaların vətəndaşlara ayrıca məhsul növü kimi təqdim edilməsi barədə qərarına izah verib.
İzahda bildirilib ki, 15 mikrona qədər olan polietilen məhsulların idxalı, istehsalı, habelə ticarət, ictimai iaşə obyektlərində satılması və ya verilməsi qadağan edilib: "...Beynəlxalq təcrübədə istehlakçılara (alıcılara) ayrıca məhsul növü kimi təqdim edildikdə bu torbalara tələbat 50-60% azalır".