Azərbaycan 19 məhbusu İrana təhvil verib.
Bu bərədə Ədliyyə Nazirliyi məlumat yayıb.
Məlumata görə, bu, Azərbaycan və İran ədliyyə nazirlikləri arasında hüquqi sahədə həyata keçirilən əməkdaşlıq çərçivəsində bugün, mayın 27-də gerçəkləşib.
Nazirlikdən bildirildiyinə görə, Azərbaycanda cəza çəkən 19 nəfər İran vətəndaşı öz ölkəsinə təhvil verilib.
Qeyd olunub ki, beynəlxalq hüquq əməkdaşlığı çərçivəsində məhkumların verilməsi sahəsində işin dairəsi də genişlənib: "Belə ki, bir sıra dövlətlərlə, o cümlədən Rusiya, Ukrayna, Litva, İran, Pakistan və Çin ilə bu sahədə müqavilələr bağlanılıb. Eləcə də dövlətimiz Avropa və MDB-nin (Müstəqil Dövlətlər Birliyi) müvafiq konvensiyalarının iştirakçısıdır. Həmin sənədlər əcnəbi məhkumların cəzalarının qalan hissəsini çəkmək üçün vətəndaşı olduqları ölkələrə verilməsini təsbit edir".
Verilən məlumata görə, son 5 il ərzində Ədliyyə Nazirliyi 161 xarici məhkumun təhvil verilməsinə, xaricdə cəza çəkən 143 Azərbaycan vətəndaşının isə ölkəyə gətirilməsinə nail olub: "Ədliyyə Nazirliyi beynəlxalq hüquq əməkdaşlığının dərinləşdirilməsi istiqamətində bundan sonra da lazımi tədbirləri davam etdirəcək".
Amma bu açıqlamaya İrana təhvil verilən məhkumların vəkilləri və ya yaxınlarından münasibət almaq mümkün olmayıb.