BMT-nin insan haqları ekspertləri İranın beynəlxalq hüququ pozaraq daha bir yeniyetməni edam etməsinin onları “sarsıtdığını” deyirlər.
Ölümlə nəticələnmiş bıçaqlanmada təqsirli bilinəndə 17 yaşı olan Shayan Saeedpour aprelin 21-də edam olunub, BMT-nin xüsusi məruzəçiləri Javaid Rehman və Agnes Callamard bəyanatlarında bildirirlər.
Onlar İranın tezliklə daha artıq edam həyata keçirəcəyindən narahatlıq ifadə ediblər, onların sırasında daha bir yeniyetmə də ola bilər.
Saeedpour 2018-ci ilin oktyabrında qətldə təqsirli bilinərək ölümə məhkum edilib.
İran koronavirusdan ən çox ziyan görmüş ölkələrdəndir, 5 min 300 nəfərin virusdan öldüyü bildirilir. Martda 100 minədək məhbus müvəqqəti azadlığa buraxılıb.
Saeedpour martın sonunda qiyam nəticəsində məhbəsdən qaçan onlarla məhbusdan biriydi. O, aprelin 3-də yenidən həbs olunub.
BMT ekspertləri deyirlər ki, İran hakimiyyəti ölüm cəzasını gözləyənlərin edamı sürətləndirə, məhbuslara işgəncə verə, qiyamda iştirak edənləri mühakiməsiz öldürə bilər.