«Tövbə» Cəmiyyətinin sədri, Bakının Yasamal rayonunda yerləşən «İmam Hüseyn» məscidinin axundu Əbdül Almas oğlu Əbdülov (Hacı Əbdül) vəfat edib.
Bunu «İmam Hüseyn» məscidindən bildiriblər.
Məsciddən verilən məlumata görə, o, aprelin 5-dı gecə vəfat edib: «Son zamanlar onun ürəyində problem yaranmışdı, vəfat etməsinə də elə ürək çatışmazlığı səbəb olub», - məsciddən bildiriblər.
Ə.Əbdülov 1940-cı ildə Bakıda doğulub. 1989-cu ildə «Tövbə» Cəmiyyətini yaradıb və ona rəhbərlik edib.
1991-95-ci illərdə deputat olub. O, ötən əsrin 90-cı illərində siyasi proseslərə də qoşulub. 1990-1992-ci illərdə Azərbaycana rəhbərlik edən Ayaz Mütəllibovun fəal tərəfdarlarından olub. Son zamanlar isə yeni yaratdığı «Vətən Naminə Xalq Birliyi» Hərəkatına rəhbərlik edirdi.