Türkmənistanda hakim orqanlar pambıq planını dolduran icarədar və kombaynçılara tapşırıblar ki, 43 düyümlük televizor alaraq Məhsul bayramına getsinlər, bu hədiyyə prezidentin adından onlara təqdim olunacaq.
Bu haqda AzadAvropa/AzadlıqRadiosunun türkmən xidməti – Azatlık Radiosu məlumat yayıb.
Yeni televizor almağa imkanı olmayanlara isə tapşırılıb ki, köhnə televizorlarını “bəzəkli bağlatdırıb” gətirsinlər.
Bayramqabağı büdcə təşkilatı işçiləri meyvə-tərəvəzi yuyub qəşəng qutulara qoymaqla məşğul olub. Axı, Məhsul bayramında hamısını televizorda göstəriblər. Mexanizatorlara cızıqları rəngləmək, traktor və yük maşınlarını yumaq tapşırılıb.
Türkmənistanda dövlət bayramlarını televizorda göstərmək üçün öncədən çəkirlər.