Praqada yüzminlərlə etirazçı Baş nazir Andrej Babis-in istefasını tələb edib.
İyunun 23-də Letna Parkda keçirilən yürüşə təşkilatçılar 250 minədək adamın qatıldığını deyiblər. Bu, 1989-cu il kommunizmin çöküşündən sonra ən böyük etiraz sayıla bilər.
Nümayişçilər əllərində “İstefa”, “Demokratiyadan əl çəkməyəcəyik” yazılmış plakatlar tutub, Çexiya və Avropa Birliyinin bayraqlarını qaldırıblar.
Son həftələr Babis-ə qarşı bir neçə nümayiş keçirilib. 64 yaşlı milyarder dələduzluqda, maraqlar toqquşmasına ittiham olunur.
Prokurorlar 2018-ci ildə Babis-ə Avropa Birliyinin ayırdığı 2,24 milyon dollarlıq subsidiyadan düzgün istifadə etməmək ittihamı irəli sürüblər.
Həmin subsidiyanın ayrıldığı şirkət Babis-ə məxsus Agrofert konqlomeratının olub. Subsidiya konqlomerata sahiblik Babis-in ailə üzvlərinə ötürüləndən sonra ayrılıb.
Subsidiyalar orta və kiçik biznes üçün nəzərdə tutulub, Agrofert onu ala bilməzdi.
Babis hansısa yanlışa yol vermədiyini deyir, məsələni “siyasi” adlandırır.
İyunun 4-də baş nazirə qarşı Praqanın mərkəzindəki Vençeslas meydanındakı yürüşə 120 min nəfər qatılıb.