ABŞ Prezidenti Donald Trump yenə deyir ki, gələn həftə Yaponiyada Böyük 20-liyin (G20) sammitində rusiyalı həmkarı Vladimir Putin-lə görüşəcək.
İyunun 19-da Fox News-a müsahibəsində Trump deyib ki, iyunun 28-29-da Osakada keçiriləcək sammitdə Putin və çinli həmkarı Xi Jinping-lə görüşləri olacaq.
“Rusiyayla yola getmək istəyirəm və məncə, bunu edəcəyik. Çinlə yola getmək istəyirəm və məncə, bunu edəcəyik. Gələn həftə Yaponiyada hər ikisi ilə görüşəcəyəm”, – Trump söyləyib.
Trump iyunun 12-də də Ağ evdə jurnalistlərə demişdi ki, G20 sammitində Putin-lə görüşəcək.
Ancaq Kreml onda bildirirdi ki, potensial görüş barədə Vaşinqtondan təsdiq almayıb.
Trump-ın son açıqlamasını Kreml hələlik, şərh etməyib.
Putin-lə Trump sonuncu dəfə 2018-ci ilin iyulunda Helsinkidə təkbətək görüş keçiriblər.
Vaşinqtonla Pekin Trump və Xi-nin G20 sammitində görüşəcəyini təsdiqləyib.