“Reuters” xəbər verir ki, Birləşmiş Ştatlar beş yeni ölkəyə F-35 qırıcıları satmağı nəzərdən keçirir. Həmin ölkələr içində Rumıniya, Polşa və Yunanıstan var.
Agentlik aprelin 4-də ordunun F-35 idarəsinin rəhbəri, vitse-admiral Mathias Winter-ə istinadla yazıb ki, “Xarici Hərbi Satışların gələcək potensial müştəriləri içində Sinqapur, Yunanıstan, Rumıniya, İspaniya və Polşa var”.
Winter bunu ABŞ Nümayəndələr Palatasına yazılı ifadəsində qeyd edir.
2018-ci ildə Belçika F-35 son illər ərzində ilk yeni müştərisinə çevrildi. Daha doqquz ölkə – Britaniya, Avstraliya, İtaliya, Norveç, Niderland, İsrail, Yaponiya, Cənubi Koreya və Türkiyə də bu qırıcıları almaq üçün sənəd imzalayıblar.
Amma Vaşinqton Türkiyənin F-35 proqramında iştirakını dayandırıb. Səbəb Ankaranın ABŞ və NATO-nun qarşı çıxmasına baxmayaraq Rusiyadan S-400 müdafiə sistemləri almaq qərarıdır.
Finlandiya, İsveçrə və BƏƏ də F-35 almağı nəzərdən keçirir.
Bu tip alışlar hökumətlərarası sazişlər hesab olunur.