Sibirin Krasnoyarsk şəhərində partlayış nəticəsində yaşayış binasının bir hissəsi dağılıb. Yerli rəsmilər iki nəfərin həlak olduğunu deyirlər.
Rusiya Fövqəladə Hallar Nazirliyinin Krasnoyarsk şöbəsinin fevralın 15-də bildirməsinə görə, insidentə ötən axşam təbii qaz sızması səbəb olub. Üçmərtəbəli binada altı mənzil dağılıb.
Son həftələr Rusiyada azı iki oxşar hadisə baş verib.
Yanvarın 13-də cənubdakı Rostov regionunun Şaxti şəhərində təbii qaz sızması yaşayış binasının bir hissəsini dağıdıb, beş nəfər həlak olub.
Dekabrın 31-də isə Maqnitoqorsk şəhərindəki partlayışda 39 nəfər ölüb. Rəsmilər həmin hadisəyə də qazsızmanın səbəb olduğunu deyiblər. Amma İslam Dövləti terrorçu qrupu insidentə görə məsuliyyəti üzərinə götürüb.