Bu yaxınlaradək Şimali Koreyanın İtaliyadakı səfiri vəzifəsini icra etmiş diplomatın gizləndiyi bildirilir. Bunu Cənubu Koreyanın kəşfiyyat agentliyi Seulda deputatlara deyib.
Deputat Kim Min-ki bildirib ki, Milli Kəşfiyyat Xidmətinin rəsmisi bu məlumatı onlarla yanvarın 3-də qapalı iclasda bölüşüb.
Pxenyanın Romadakı səfiri vəzifəsini icra edən Jo Song-gil həyat yoldaşı ilə birlikdə noyabrın əvvəlində rəsmi iqamətgahı tərk edib. Onun diplomatik missiyasının bitməsinə bir neçə həftə qalırdı.
Bu açıqlamadan öncə yayılmış təsdiqlənməmiş məlumatlarda Jo-nun Qərb ölkələrinin birindən sığınacaq istədiyi bildirilirdi.
Şimali Koreya diplomatın statusuyla bağlı hələlik, açıqlama verməyib.
48 yaşlı Jo 2017-ci ilin oktyabrından Romadakı səfirin vəzifəsini icra edirdi. İtaliya ovaxtkı səfir Mun Jong-nam-ı Şimali Koreyanın nüvə sınağına etiraz olaraq qovmuşdu.
Şimali Koreyanın Londondakı səfirinin köməkçisi Thae Yong Ho 2016-cı ildə vəzifəsini tərk edib, arvadı və uşaqlarıyla birlikdə Cənubi Koreyaya sığınıb.