«Azərbaycanda bank siyasətinin kredit faizlərinə təsir imkanlarını artırmağa çalışırıq. Bununla bağlı islahat gündəliyi var».
«Turan» agentliyinin xəbərinə görə, bunu bu gün, oktyabrın 30-da Azərbaycan Mərkəzi Bankının sədri Elman Rüstəmov deyib.
«İnflyasiyanın hədəflənməsi rejiminə keçməyə hazırlaşırıq. Hələ ki, depozit və kredit faizlərinə təsir imkanları zəifdir. Bu rejimə keçəndən sonra təsir imkanlarımız arta bilər», - o vurğulayıb
E.Rüstəmovun deməsinə görə, hazırda neftin bahalaşmasının Azərbaycan manatının məzənnəsinin möhkəmlənməsinə təsiri cüzidir.
Azərbaycanda kredit faizləri ilə bağlı çoxsaylı şikayətlər eşidilir. Bu günlərdə iqtisadçılardan Vüqar Bayramov isə vəziyyəti belə dəyərləndirmişdi: «Bank vətəndaşdan 7 faizlə aldığı manatı digər vətəndaşımıza 4 dəfə baha faizlə kredit formasında təklif edir. Xarici valyutalar üzrə isə daha yüksək fərq müşahidə edilməkdədir».