Azərbaycan Mərkəzi Bankının (AMB) valyuta ehtiyatları artıb.
AMB-nin yeni açıqlanmış məlumatına görə, artım son bir ildə 10 faizdən çox olub.
Bu il avqustun 1-də bankın valyuta ehtiyatları 5 mlrd. 546.7 mln. dollar təşkil edib. Bu göstərici ötən ilin ortaları ilə müqayisədə 513.6 mln. dollar çoxdur.
Valyuta ehtiyatları bu il iyulun 1-i ilə müqayisədə 34 mln. dollar çoxalıb.
Son illər valyuta hərraclarına MB-nin yox, Neft Fondunun vəsaitləri çıxarılır.
Pul bazası
Azərbaycanın pul bazasında da son bir ildə artım müşahidə edildiyi bildirilir.
AMB vurğulayıb ki, pul bazasının həcmi avqustun 1-nə 8 mlrd. 888.9 mln. manat olub. Bu göstərici 2017-ci ilin eyni dövrü ilə müqayisədə 556 mln. manat çoxdur.
Pul bazası iyulun 1-i ilə müqayisədə 300 mln. manatdan çox artıb.
Problemli kreditlər də artıb
Mərkəzi Bank problemli kreditlərlə bağlı rəsmi məlumatları da bölüşüb. Həmin məlumata görə, vaxtı keçmiş kreditlərin ümumi məbləği iyulun 1-də 1 mlrd. 745.7 mln. manat olub.
Belə kreditlər iyunun 1-nə olan göstəricilərlə müqayisədə azı 2 faiz çoxalıb. Bu ilin yanvar ayının göstəriciləri ilə müqayisədə isə problemli kreditlər 7 faiz çoxalıb.
Müstəqil ekspertlər isə hesab edirlər ki, əslində problemli kreditlərin həcimi reallıqda daha çoxdur.
Azərbaycanda problemli kredit məsələsi 2015-ci ildə baş verən devalvasiyalardan sonra aktuallaşıb. Onda manat dollar qarşısında 2 dəfə dəyər itirmişdi.