ABŞ-da dairə məhkəməsinin hakimi prezident Donald Trump-ın seçki kampaniyasının keçmiş rəhbəri Paul Manafort-a hökumətin ittihamlarına cavablandırmaq üçün vaxt verib. Yoxsa onun məhkəmə öncəsi zaminə buraxılması ləğv oluna bilər.
Hakim iyunun 5-də Manafort-un komandasına iyunun 8-dək vaxt qoyub ki, xüsusi prokuror Robert Mueller-in ittihamını cavablandırsın. Manafort işdə potensial şahidə təzyiq göstərmək cəhdində suçlanır. Mueller bu ittihamı əsas gətirərək məhkəmədən Manafort-un zaminə buraxılması məsələsinə yenidən baxmasını istəyib. Məhkəmə iyunun 5-nə təyin olunub.
Manafort-un sözçüsü Jason Maloni iyunun 5-də bu iddianı təkzib edib, müştərisinin “günahsız” olduğunu deyib, “məhkəmədə danışacağıq” deyə vurğulayıb.
Mueller Rusiyayla Trump-ın 2016-cı ildə seçki kampaniyası arasında mümkün əlaqələri araşdırır. Manafort çirkli pul yumada, xarici agent kimi qeydiyyatdan keçməməkdə ittiham olunur. Ancaq özü təqsirsiz olduğunu deyir.