Gürcüstanın baş naziri Giorgi Kvirikashvili, yenidən qurduğu hökumətiylə birlikdə parlamentdə etimad səsverməsindən keçib.
Dekabrın 21-də baş tutmuş səsvermədə 103 deputat hökuməti dəstəkləyib, 17 nəfər əleyhinə səs verib.
Bu səsvermə hökumətin strukturu barədə qanuna noyabrda qəbul olunmuş dəyişikliklərdən dolayı keçirilirdi. Dəyişikliklər nəticəsində nazirliklərin sayı 18-dən 14-ə salınıb.
Kvirikashvili yenidən qurulmuş hökumətdə də bəzi dəyişikliklər təklif edib.
Etimad səsverməsindən bir gün öncə Kvirikashvili müxalifətin Vahid Milli Hərəkatını (ENM) təmsil edən deputatlarla görüşüb. Görüş baş nazirlə ENM-dən deputat Nika Melia arasında söz savaşıyla bitib. Tərəflər bir-birini səriştəsizlikdə və qeyri-peşəkarlıqda ittiham ediblər.