Neapolitan pitsasının hazırlanması sənəti dünyanın mədəni irs siyahısına salınıb. UNESCO dekabrın 7-də Neapolitan “pizzaiuoli”, yəni pitsa hazırlanmasını Qeyri-maddi Mədəni İrs siyahısına daxil edib.
Qurum Cənubi Koreyada keçirilən toplantıdan sonra “Təbriklər, İtaliya!” deyə Twitter-də yazıb.
İtaliya “pizzaiuoli” praktikasının – xəmirin hazırlanması və açılması, üstünün doldurulması və odun sobasında bişirilməsini bu ölkənin mədəni və qastronomik ənənəsi sayır.
NUTELLA-SIZ PİZZA
Romada pitseriya sahibi Romano Fiore “Reuters” informasiya agentliyinə müsahibəsində qərarı alqışlayıb. “Bütün italyanlar və neapolitanlar kimi fəxr edirəm… pitsanın neçə əsrlik yaşı var”, – o deyib.
Neapolitan pitsasının xəmiri nazik, qıraqları nisbətən qalın olur, bişərkən kənarları nazik velosiped təkəri kimi qalxır.
Odunla qızdırılan kərpic sobada bişirilən bu pitsanın iki klassik versiyası var: marinara (pomidor sousu, sarımsaq, qaraqınıq (oreqano) və yağ) və marqarita (pomidor, motsarella pendiri, yağ və reyhan).
Marqarita pitsasının 1889-cu ildə Kraliça Margherita-nın şərəfinə yaradıldığı nəql edilir.
Pitsa bütün dünyada sevimli yeməyə çevrildikcə, onun üst içliyinə xeyli innovasiyalar olunub, bu da italyanları karıxdırıb.
Fiore's pitseriyasının müştərisi Matteo Martino qərardan öncə deyib: “Ümid edirəm, bu qərar əcnəbilərə pitsanın əslində necə hazırlanmasını anlamağa kömək edər, yəni Nutella-sız və ananassız...”
SİYAHIYA DAHA NƏLƏR DÜŞÜB
UNESCO həmçinin çövkəni İranın, yel dəyirmanlarını Niderlandın mədəni irsi kimi tanıyıb.
İndoneziyanın Cənubi Sulavei adasında ənənəvi qayıqqayırma, Malavidə qarğıdalıdan hazırlanan Nsima yeməyi də artıq bu siyahıdadır.
Türk qəhvəsi, Xorvatiyanın zəncəfilli kökəsi və Gürcüstanın Qvevri qədim şərabçəkmə ənənəsi bir müddətdir UNESCO-nin yemək mədəniyyəti siyahısındadır.
*** Buna da bax: Kamança da UNESCO-lu oldu
Azərbaycana gəlincə, kamança hazırlanması və ifaçılıq sənəti, dolma hazırlama və paylaşma ənənəsi, Azərbaycan muğam ifaçılığı, Lavaş bişirmə və paylaşma ənənəsi, Lahıc misgərlik sənəti, aşıq sənəti, Novruz bayramı, xalça sənəti, tar ifaçılığı, kəlağayı sənəti UNESCO-nun Qeyri-maddi Mədəni İrs üzrə Reprezentativ siyahısında, Çövkən – Qarabağ ənənəvi atüstü oyunu isə UNESCO-nun Təcili qorunmaya ehtiyacı olan qeyri-maddi mədəni irs siyahısında yer alır.