ABŞ Senatının Xarici Əlaqələr Komitəsinin aparıcı üzvlərindən olan demokrat Ben Cardin prezident Donald Trumpa göndərdiyi məktubunda yazıb ki, Türkiyənin Rusiyadan S-400 raketləri alması ABŞ-ın Rusiyaya qarşı sanksiyalar qanununu pozur.
Sentyabrın 14-də göndərilən məktubda deyilir ki, ABŞ qanununa görə,Rusiya ordusu və ya kəşfiyyatı ilə hər hansı əhəmiyyətli pul köçürmə aparana qarşı sanksiya nəzərdə tutulur.
Türkiyənin Rusiya ilə həmin raket sazişi sentyabrın 12-də bağlanıb və qiyməti 2,5 milyard dollardır.
Tənqidlərlə bağlı Türkiyə prezidenti Erdoğan demişdi ki, NATO özünü günahlandırmalıdır, çünki Türkiyə bu raket sistemini NATO-dan istəyirdi, NATO isə Türkiyəyə raket sistemləri verməyi yubadırdı.
Erdoğanın sözçüsü İbrahim Kalin isə sentyabrın 14-də bildirmişdi ki, Türkiyənin Rusiyadan raket almağı Türkiyənin Qərblə əlqələrinin qırılmağı demək deyil.