Myanmada rohinca müsəlmanlarına qarşı zorakılıqlara sentyabrın 4-də kəskin reaksiya verilib. Müsəlman ölkələri BMT-dən hərəkətə keçməyi tələb edəcəklərini dilə gətiriblər. Son bir ayda Myanmada 400-dən çox rohinca müsəlmanının qətlə yetirildiyi, 90 min rohincanın qonşu Banqladeşə qaçdığı bildirilir.
İran bunu «etnik təmizləmə», Türkiyə «soyqırımı» adlandırıb. Türkiyə prezidenti Recep Tayyip Erdoğan məsələni bu ay BMT Baş Assambleyasının müzakirəsinə çağırmağı təklif etmişdi. İranın xarici işlər naziri Javad Zarif Twitter-də bu təklifi dəstəkləyib, «rohinca müsəlmanlarına qarşı davam edən zorakılıqla bağlı qlobal sükut»u pisləyib.
Avqustun 25-də Rakxayn ştatında rohinca yaraqlıları polis məntəqəsinə hücum edib. Hakimiyyət məhz bundan sonrakı toqquşmalarda azı 400 nəfərin öldürüldüyünü bildirir.