Gürcüstanda 2 min 800 hərbçinin iştirakıyla hərbi təlimlər başlanıb. Təlimlərə Gürcüstan və Birləşmiş Ştatlar daxil olmaqla, 8 ölkənin əsgərləri qatılıb.
Gürcüstanın baş naziri Giorgi Kvirikashvili və digər liderlər iyulun 30-da bildiriblər ki, bu tədbir onların NATO-ya qoşulması məqsədinə doğru vacib addımdır.
«Bu təlimlər Gürcüstana NATO standartlarına yaxınlaşmağa, bütün regionda sabitliyi gücləndirməyə kömək edəcək», – Tbilisi yaxınlığındakı Vaziani hərbi bazasındakı açılış mərasimində Kvirikashvili deyib.
2008-ci ildə Buxarestdə keçirilən sammitdə NATO liderləri Gürcüstanın NATO üzvü olacağına dair vəd veriblər. Ancaq Moskvanın dirənişi ucbatından bu hədəfə çatılması yubanıb.
«Layiqli Tərəfdaş» adlı ikigünlük təlimlərdə ABŞ-dan 1600, Gürcüstandan 800 əsgər iştirak edir. Təlimlərə Britaniya, Almaniya, Türkiyə, Ukrayna, Sloveniya və Ermənistan hərbçiləri də qatılıb.