Monteneqronun keçmiş baş naziri Milo Djukanovic deyib ki, Rusiya Balkanlarda stabilliyi pozmağa çalışır. M.Djukanovic Moskvaya meylli qüvvələrin ölkənin indiki rəhbərliyinə qarşı çoxlu material əldə etdiyini, ruspərəst müxalifətçilərin hakimiyyəti devirməkdən ötrü hətta qan tökməyə hazır olduğunu bildirib.
M.Djukanovic deyib ki, ruspərəst müxalifətin yaratmaq istədiyi hökumət Moskvanın marionetinə çevrilər və yalnız Rusiyanın maraqlarına xidmət edər. Bununla da Rusiya NATO-nun Balkanlarda genişlənməsinə imkan verməz.
Monteneqro Rusiyanın Balkanlarda nüfuzunu bərpa etmək yönündə əsas hədəflərdəndir. Rus rəsmiləri bu yaxınlarda Serbiya, Bosniya, Makedoniya və Monteneqronun Moskvanın maraq dairəsində olduğunu, bu ölkələrin NATO-ya qoşulmalı olmadıqlarını bildiriblər.
M. Djukanovic ölkəsinin NATO-ya qoşulmasını istəyənlərdəndir.